އެމެރިކާގެ މަޝްހޫރު މޮޑެލް ބެއްލާ ހަދީދަށް މީހަކު ފާރަލުމުން ކޯޓު މެދުވެރިކޮށް އެ މީހާއަށް ހަދީދްއާ ކައިރި ނުވެވޭ ގޮތަށް ހިފެހެއްޓޭ އަމުރެއް ހޯދައިފި އެވެ.
ބެއްލާއަށް ފާރަލީ ކަމުގެ ތުހުމަތުގައި މިދިޔަ ހަފުތާގައި އުމުރުން 37 އަހަރުގެ ފިރިހެނަކު ހައްޔަރު ކުރި އެވެ. ބްރިއަން ޕެރެޒް ކިޔާ އެމީހާ ވަނީ ބެއްލާގެ އެޕާޓްމަންޓް ހުންނަ ބިލްޑިންގެ ވީޑިއޯ ނަގާ އިންސްޓަގުރާމް މެދުވެރިކޮށް ބެއްލާއަށް ތަފާތު އިންޒާރުތަކާއެކު މެސެޖުތައް ފޮނުވާފަ އެވެ.
ބްރިއަން ވަނީ ބެއްލާ އަށް ކުރި މެސެޖުތަކުގައި ބެއްލާއާއި އޭނާގެ އައިލާގެ މެމްބަރުންނަށް ވެސް އިންޒާރުދީ މެސެޖުތައް ފޮނުވާފަ އެވެ. މިދިޔަ ޑިސެމްބަރުގެ ފެށިގެން ބްރިއަން އެކި ކަހަލަ މެސެޖުތައް ބެއްލާއަށް ފޮނުވާފައިވެ އެވެ. ބެއްލާގެ ދިރިއުޅޭ ގޭގެ ކުރި މައްޗަށް ގޮސް އޭނާ ބެއްލާގެ ނަމުން ގޮވާ ފުރައްސާރަ ކޮށްފައިވާ ކަމަށްވެސް ބެއްލާ ބުންޏެވެ.
ބްރިއަންގެ މައްޗަށް ކޯޓުން މިހާރު ވަނީ ދެ ދައުވާއެއް ކޮށްފަ އެވެ. އެއީ މީހަކަށް ފުރައްސާރަ ކުރުމާއި ފާރަލުމުގެ ކުށުގެ ދައުވާ އެވެ.