"ކަންކަމާ ކުރިމަތިލާން ވާނީ ފިރިހެނުން، ކަންކަމާ ކުރިމަތިލާން ވާނީ ކެރޭ މީހުން،" 1 ފެބްރުއަރީގެ ވަރުގަދަ އަމުރަށް ފަހު އާންމުންގެ ތެރެއަށް ނިކުމެވަޑައިގެން ރައީސް އަބްދުﷲ ޔާމީން ވިދާޅުވި މިހެނެވެ؛ މިއީ އެފަދަ ވާހަކައެއް ރައީސް ޔާމީން ވިދާޅުވި ފުރަތަމަ ފަހަރެއް ވެސް ނޫނެވެ. މީގެ ކުރިން އެތަށް ފަހަރެއްގެ މަތިންވެސް ތަންކޮޅެއް "ފިރިހެން" ވުމަށް ގޮވާލެއްވި އެވެ. އެއީ އެއްގޮތަކަށް ވެސް އަންހެން ކަނބަލުންނަށް ދެރަ ބަހަކަށް ވިދާޅުވި އެއްޗެއް ވެސް ނޫނެވެ. އެއީ ކެރިގެން ނިކުތުމަށާއި ނުވަތަ ކަންކަމާ "ގަޓު" ހުރެގެން ކުރިމަތިލުމަށް ގޮވާލަން ދެއްވާ ހިތްބވަރެކެވެ.
ރާއްޖޭގައި މިހާރު މި އޮތް ހާލަތާއެކު މިދިއަ ދުވަސްތަކުގައި ހީވެސް ނުކުރާ ގޮތަކަށް ފިރިހެނުންނަށްވުރެ ކުރިން "ގަޓް" ކަން ދައްކާލަން ކެރުނީ އަންހެނުންނަށެވެ. އެއްވެސް ބިރަކާ ނުލައި ބަސް ބުނި ކަނބަލުންތަކެއްގެ ވާހަކަ މިހާރު އެންމެން އަންނަނީ ދައްކަމުންނެވެ. އެންމެން ވެސް ބުނަނީ އެއީ ފިސާރި ކަނބަލުން ކަމަށެވެ.
މިހާރު ހިނގާ ކަންތައްތަކުގެ ތެރެއިން ތެދުވި އެއް ކަނބަލަކީ ރައްޔިތުންގެ މަޖިލީހުގެ ކައުންސިލާ ޖެނަރަލް ފާތުމަތު ފިލްޒާ އެވެ. ކުއްލި ނުރައްކަލުގެ ގަރާރު ފާސް ކުރަން އުޅެނީ ޣައިރު ގާނޫނީ ގޮތަކަށް ކަން ގަބޫލު ކުރެވިގެން އެއްޗެއް ވިދާޅު ނުވެ އިންނެވުމުގެ ބަދަލުގައި ތެދުވެވަޑައިގެން އެއީ ޣައިރު ގާނޫނީ ކަމެއް ކަމަށް ވިދާޅުވެ ޖަލްސާ ދޫކޮށް ވަޑައިގަތީ އެވެ.
އެކަންވެގެން ދިޔައީ އޭނާއަށް ގިނަ ބައެއްގެ ސަމާލުކަން ހުއްޓުނު ސަބަބަކަށެވެ. ޖެހިގެން އައިރޭ އޮތް ރިޔާސީ ބަޔާން އިއްވާ ޖަލްސާއަށް ވެސް ވަޑައިގެން ބައިވެރިވި އެވެ. ފިލްޒާގެ ގަޓް އެ ރޭ ފެނިގެން ދިޔަ އެވެ.
ދެން އޮތީ ރާއްޖޭގެ ފުރަތަމަ އަންހެން ޕްރޮސެކިއުޓާ ޖެނަރަލް އައިޝަތު ބިޝާމްގެ ވާހަކައެވެ. އޭނާ ހުންނެވި މަގާމުގެ ސަބަބުން މީހާތަނަށް ހީކޮށްގެން ތިބީ ބިޝާމް "ފިތިފައި" އިންނެވި ކަމަަށެވެ. ނަމަވެސް އޭނާއަށް ފެންނަ ގޮތް ދެއްކެވި އެވެ.
ބިޝާމް ވަނީ ކުއްލި ނުރައްކަލުގެ ހާލަތުގެ ގަރާރު ރައްޔިތުންގެ މަޖިލީހުން ފާސް ކޮށްފައިވަނީ ގާނޫނާ ހިލާފަށް ކަމަށް ދެކެވަޑައިގަންނަނާތީ އެ ހާލަތު ނެތް ކަމަށް ވިދާޅުވެ ފުލުހުންނަށް ސިޓީއެއް ފޮނުވައިފަ އެވެ. އަދި ކުއްލި ނުރައްކަލުގެ ހާލަތާ ގުޅިގެން ފުލުހުންނަށް ދެއްވި ލަފާއަށް އަމަލުކުރަން ފުލުހުންގެ އިސްވެރިން ދެކޮޅު ހެއްދެވުމުން އެކަމަނާ އިސްތިއުފާ ދެއްވަން ވެސް އުޅުއްވީ އެވެ.
އެޓާނީ ޖެނަރަލް އޮފީހުގެ އިސްކޮށް އުޅުއްވާ ދެ އަންހެން ވަކީލެއްގެ ވާހަކަ ވެސް އެބައޮތެވެ. ފިރިހެނުންނަށް ދެއްކި މިސާލެއްގެ ގޮތުގައި އެ ދެ ނަން ވެސް މިހާރު ހިނގަ އެވެ.
އޭޖީ އޮފީހުގެ ސްޓޭޓް އެޓާނީއެއްގެ މަގާމުގައި ހުންނެވި މަރިޔަމް ޝުނާނާ ޓްވިޓާ މެދުވެރިކޮށް ވަނީ އަޑު އުފުލައިފަ އެވެ. އަދި އެ އޮފީހުގެ ޑެޕިއުޓީ ކައުންސެލާ ޖެނެރަލް ޝަފީއާ ރިޒާ ވަނީ އިސްތިއުފާ ދެއްވައިފަ އެވެ.
"ޕީއެސްއެމް" ގެ ޑެޕިއުޓީ މެނޭޖިން ޑައިރެކްޓަރު ޝާޔަން ޝާހިދުގެ ނަން ވެސް އެބައޮތެވެ. އޭނާ ޕީއެސްއެމްގެ ބޯޑުގައި ހުންނަވައިގެން ކުރެއްވި މަސައްކަތެއްގެ ސަބަބުން ސަސްޕެންޑްވުމުންނެވެ. ޝާޔަންއާއެކު އެސިސްޓަޓް ޕީޖީ ޖިހާދާ އަނީސްގެ ނަމާއި ސިޔާސީ ދާއިރާގައި އަނގައިން ނުބުނާ ފިލުމް ތަރި ނިއުމާ ނަން ވެސް އެބައޮތެވެ. މިއީ މީގެ ކުރިން ނުފެންނަ ތަފާތު ކަމެކެވެ. މިހާރު މިދުވަސްވަރު "ފިރިހެން" ވެބަލާށޭ ބުނާނެ މީހަކު ނުވެ އެވެ. އެންމެން ވެސް ގޮވާލަނީ އެ ކަނބަލުން ހެން "އަންހެން" ވާށޭ އެވެ.