ދިވެހިންގެ މެދުގައިވެސް ބޮޑު މަގުބޫލުކަމެއް ހޯދާފައިވާ އޭބީސީ އިން ގެނެސްދެމުންދާ ޓީވީ ސީރީޒް "ވަންސް އަޕޯން އަ ޓައިމް" ގެ އެންމެފަހު އެޕިސޯޑަށް، އެ ސީރީޒްގެ ޓީމުން ތައްޔާރުވަމުން އެބަދެ އެވެ.
ފެއަރީ ޓޭލްސް ވާހަކަތަކުގެ މައްޗަށް ބިނާކޮށް ގެނެސްދޭ މި ސީރީޒްގެ ފަހު އެޕިސޯޑުގައި ކުރީގެ ސީޒަންތަކުގައި ފެނިގެންދިޔަ ގިނަ އެކްޓަރުންތަކެއް ފެނިގެންދާނެ ކަމަށް ހޮލީވުޑް ރިޕޯޓާއިން ބުނެ އެވެ. ސީރީޒްގެ ޓީމުން ވަނީ އެ ސީރީޒްގެ ކުރީގެ ސީޒަންތަކުގައި އެކި ރޯލުތަކުން ފެނިގެންދިޔަ ހުރިހާ މީހުނަށް ފަހު އެޕިސޯޑުގައި ބައިވެރިވުމަށް އޯޕަން އިންވިޓޭޝަނެއް ދީފަ އެވެ.
އެ ސީރީޒްގެ ސީޒަން ހައެއް ނިމިގެންދިޔައިރު، ހަ އަރުވަންދެން ސީރީޒްގެ ލީޑުން ފެނިގެންދިޔަ ގިނަ ތަރިންތަކެއް ވަނީ ސީރީޒް އިން ވަކިވެފަ އެވެ. އެ ތަރިންގެ ތެރޭގައި ހިމެނެނީ ޖެރެޑް ގިލްމޯ (ހެންރީ)، ގިނިފާނާ ގުޑްވިން (ސްނޯ ވައިޓް)، ޖެނިފާ މޮރިސަން (އެމާ ސްވޯން)، ޖޯޝް ޑެލަސް (ޕްރިންސް ޗާމިން)، އެމިލީ ޑީ ރާވިން (ބެލް) އަދި ރެބެކާ މޭޑާ (ޒެލްނާ) އެވެ. މީގެ ތެރެއިން ފަހު އެޕިސޯޑަށް އަނބުރާ އަންނާނެކަން އަދި މިހާތަނަށް ކަށަވަރުވެފައި ވަނީ ޖެރެޑް އެކަންޏެވެ.
ފަހު އެޕިސޯޑަށް އަނބުރާ އަންނާނެކަން މިހާރު ކަށަވަރުވެފައިވާ އިތުރު ތަރިންގެ ތެރޭގައި ބެވް އެލިއޮޓް (ގްރޭނީ)، ޓޯނީ އެމެންޓޯލާ (މާކޯ)، ލީ އެރެންބާގް (ގްރަމްޕީ)، ޖޮއާނާ ގްރާސިއާ (އޭރިއަލް)، ރޮބީ ކޭ (ޕީޓާ ޕޭން)، ޝޯން މެގުއީ (ރޮބިން ހުޑް)، ވިކްޓޯރިއާ ސްމާޓްފިޓް (ކްރުއޭލާ) އަދި ކީގަން ޓްރޭސީ (ބްލޫ ފެއަރީ) ހިމެނެ އެވެ.
ކާމިޔާބު ހަތް ސީޒަން ދެއްކުމަށްފަހު މި ސީރީޒްގެ އެންމެފަހު އެޕިސޯޑު ދެއްކުމަށް ހަމަޖެހިފައި ވަނީ އަންނަ މެއި މަހު 18 ގަ އެވެ.