މޮރާޓާއަށް ސްޕެއިންގެ ޓީމުން ޖާގަ ނުލިބުނު

ޗެލްސީގެ ފޯވަޑް އަލްވާރޯ މޮރާޓާއަށް ސްޕެއިންގެ ސްކޮޑުން ޖާގަ ގެއްލިއްޖެ އެވެ. އެކުވެރި ކަމުގެ މެޗުތަކެއްގައި، ވޯލްޑްކަޕުގެ އެންމެ ފަހުގެ ފައިނަލުގައި ވާދަ ކުރި ދެ ޓީމު ޖަރުމަނާއި އާޖެންޓީނާއާ ދެކޮޅަށް ކުޅެން އެކުލަވާލި ސްކޮޑުން ވަނީ ބައެއް އެހެން ކުޅުންތެރިންނަށްވެސް ފުރުސަތު ގެއްލި ފައެވެ.

ސްޕެއިންގެ ކޯޗު ކަމާ، މިހާރުގެ ކޯޗު ހޫލެން ލެޕޮޓޮގީ ހަވާލުވި ފަހުން، ފުރަތަމަ ފަހަރަށް ޑިއޭގޯ ކޮސްޓާ އަށް ވަނީ އޭނާގެ ސްކޮޑުން ފުރުސަތު ދީފަ އެވެ. ޗެލްސީން އޭނާ އެތުލެޓިކޯ މެޑްރިޑަށް ދޫކޮށްލުމުން، އޭނާ އަށް އެތުލެޓިކޯގައި ކުޅެން ފުރުސަތު ލިބުނީ މި އަހަރު އެވެ. އެއީ ފީފާއިން އެތުލެޓިކޯ އަށް އަޅާފައިވާ ޓްރާންސްފާ ބޭޏްގެ ފިޔަވަޅާ ގުޅިގެންނެވެ.

ސްކޮޑުން ފުރުސަތު ނުލިބުނު މަޝްހޫރު ބައެއް އެހެން ކުޅުންތެރިންނަކީ މޮރާޓާއާއެކު ޗެލްސީ އަށް ކުޅެމުން އަންނަ ދެ ކުޅުންތެރިން ކަމަށްވާ، ސެސް ފެބްރިގާސް އާއި ޕެޑްރޯ ރޮޑްރިގޭޒް އެވެ. ރެއާލް މެޑްރިޑުން ޗެލްސީ އަށް ބަދަލުވެ ސީޒަންގެ ކުރީ ކޮޅު މޮރާޓާ ރަނގަޅު ކުޅުމެއް ދެއްކި އެވެ. ނަމަވެސް ފަހުން އޭނާ އަށް ކުރިމަތިވި އަނިޔާއާ ގުޅިގެން އޭރުގެ ކުޅުން އަލުން ދެއްކޭ ގޮތެއް ނުވި އެވެ. އޭނާ އަށް މިއަހަރު އަދި ލަނޑެއްވެސް ޖެހިފަ އެއް ނުވެ އެވެ.

މޮރާޓާ، ފެބްރިގާސް އަދި ޕެޑްރޯއަށް ފުރުސަތު ނުލިބުނު ނަމަވެސް ޗެލްސީގެ މާކޯ އޮލޮންސޯ އަށް ވަނީ އޭނާގެ ސީނިއާ ކެރިއަރުގައި ފުރަތަމަ ފަހަރަށް ގައުމީ ޓީމުން ފުރުސަތު ލިބިފަ އެވެ. ހަމަ ޗެލްސީގެ ސެސާ އަޒްޕިލިކްއޭޓާ އަށްވެސް ފުރުސަތު ދީފައި ވެއެވެ.

ފްރާންސްގައި 2016 ވަނަ އަހަރު ބޭއްވި ޔޫރޯގެ ސްކޮޑަށް އޭރުގެ ކޯޗް ވިންސެންޓޭ ޑެލެްބޮސްކޭ ވަނީ ރެއާލް މެޑްރިޑްގެ ފޯވަޑް ލޫކަސް ވަޒްކްއޭޒަށް ފުރުސަތު ދިނެވެ. އޭގެ ފަހުން މިހާތަނާ ޖެހެންދެން އޭނާ އަށް ގައުމީ ޓީމުން ޖާގައެއް ނުލިބެ އެވެ.

ނަމަވެސް މިހާރު ރެއާލް މެޑްރިޑްގައި އޭނާ ދައްކާ މޮޅު ކުޅުމާއެކު މިފހަރު އަލުން ގައުމީ ޓީމުން އޭނާ ފުރުސަތު ދިނެވެ. އޭނާ އާއެކު ރެއާލްގެ އިސްކޯ އަށާއި ޒުވާން ވިންގާ މާކޯ އެސެންސިއޯވެސް ފުރުސަތު ދިނެވެ.

އެންމެ ބޮޑު ހައިރާން ކަމެއް ލިބުނީ ނަޕޯލީގައި މޮޅު ކުޅުމެއް ދައްކަމުން އަންނަ ހޯސޭ ކެލޭހޮން އަށް ފުރުސަތު ނުލިބުމުންނެވެ.

ސްޕެއިންގެ ޓީމުން ޖާގަ ނުލިބުނު މަޝްހޫރު ކުޅުންތެރިން

ސްޕެއިންގެ ކޯޗު ކަމާ ލެޕޮޓޮގީ ހަވާލުވި ފަހުން މިހާތަނަށް އެ ޓީމު މެޗަކުން ބަލި ނުވެ އެވެ. ވޯލްޑްކަޕް ކޮލިފައިންގައި އެންމެ މެޗެއް ފިޔަވައި ހުރިހާ މެޗަކުން ސްޕެއިން މޮޅުވި އެވެ. އެ ޓީމު އެއްވަރުވީ އިޓާލީއާ ދެކޮޅަށް އެގައުމުގައި ކުޅުނު މެޗުގަ އެވެ. ނަމަވެސް ސްޕެއިންގެ މެޑްރިޑްގެ ރެއާލްމެޑްރިޑް ސްޓޭޑިއަމްގައި ކުޅުނު މެޗު އިޓާލީއާ ދެކޮޅަށް ސްޕެއިން ކާމިޔާބު ކުރީ 3-0 ންނެވެ.

ވޯލްޑްކަޕްުގައި ސްޕެއިން ހިމެނެނީ، ޕޯޗްގަލް، މޮރޮކޯ އަދި އިރާން އާއެކު ގުރޫޕް "ބީ" ގަ އެވެ.