ކުރީގެ ރައީސް މައުމޫން އަބްދުލް ގައްޔޫމްގެ ގާނޫނީ ވަކީލުންގެ ޓީމުގައި ހިމެނި ވަޑައިގަންނަވާ މުހައްމަދު ފައިސަލް ކްރިމިނަލް ކޯޓަށް ހާޒިރުވާން އަންގައިފި އެވެ.
ކްރިމިނަލް ކޯޓުން ފައިސަލަށް އަންގާފައި ވަނީ މިއަދު 2:30 ގައި އެ ކޯޓަށް ހާޒިރުވުމަށެވެ. އޭނާ ހާޒިރު ކުރަނީ ނޫސްވެރިންނާ ބައްދަލުކޮށް ދެއްކެވި ވާހަކަފުޅަކާ ގުޅިގެނެވެ.
ރައީސް މައުމޫންގެ ޝަރީއަތުގެ އަޑުއެހުމެއް އިއްޔެ ތާވަލުކުރުން އެމަނިކުފާނު ކޯޓަށް ހާޒިރު ކުރުމަށް ފަހު ހަތް ގަޑިއިރު ފަހުން އަޑު އެހުން ކެންސަލް ކުރުމާ ގުޅިގެން ފައިސަލް ވަނީ އެކަމުގެ ކަންބޮޑުވުންތައް މީޑިއާއާ ހިއްސާކޮށްފަ އެވެ. އެގޮތުން އެތަށް ގަޑިއިރުތަކެއް ވަންދެއް އެމަނިކުފާނު ކޯޓުގައި ބޭންދެވި އިރު ވަކީލުންނަށް ވެސް ރައީސް މައުމޫންއާ ބައްދަލު ކުރުމުގެ ފުރުސަތު ނުދޭ ކަމަށާއި އެއީ އެއްވެސް ހަމައަކުން ކުރި ކަމެއް ކަމަށް ގަބޫލު ނުކުރައްވާ ކަމަށް ފައިސަލް ވިދާޅުވި އެވެ.
ރައީސް މައުމޫންގެ ބަންދާ މެދު ގޮތެއް ނިންމުމުގެ މަޖިލީހެއް މިއަދުވެސް އޮވެއެވެ.
ސަރުކާރު ވައްޓާލަން އުޅުއްވުމުގެ ތުހުމަތުގައި މައުމޫންގެ މައްޗަށް އުފުލާފައިވަނީ ޓެރަރިޒަމްގެ ދައުވާ އެވެ. އޭގެ އިތުރުން އަދުލް އިންސާފު ގާއިމުކުރުމަށް ހުރަސް އެޅުއްވުމުގެ ދައުވާ ވެސް ހިމެނެ ވެ.
