ލޯކަލް ގަވާމަންޓް އޮތޯރިޓީގެ ގަވާއިދުތަކަށް ހުރިމަތްތެރިކޮށް ހިތައިކައުންސިލްތަކުގެ ޒިންމާ މޮޅަށް އަދާކުރުމުން ދޭ "ކަންގަތި" އެވޯޑުގެ އެއްވަނަ ކ. ހުރާ ކައުންސިލާއި ފުވައްމުލަކު އަތޮޅު ކައުންސިލުން ހޯދައިފި އެވެ.
ކަންގަތި އެވޯޑަކީ ލޯކަލް ގަވާމަންޓް އޮތޯރިޓީގެ ގަވާއިދުތަކާއި މިންގަނޑުތަކަށް ފެތޭގޮތަށް އެންމެ ފުރިހަމަ ޕާފޯމަންސެއް ދައްކާ ކައުންސިލްތަކުގެ އަގުވަޒަންކުރުމަށް އެލްޖީއޭގެ ބޯޑުން ކޮންމެ އަހަރަކު ދޭން ނިންމާފައިވާ އެވޯޑެކެވެ. މި އެވޯޑު ތައާރަފްކުރީ މިއަހަރު މުޅިން އަލަށެވެ. މިއަދު ފާހަގަކުރާ ލާމަރުކަޒީ ދުވަހުގެ ޖަލްސާއާއި ފުރަތަމަ ކަންގަތި އެވޯޑް ހަފްލާ މިރޭ ބާއްވާފައިވަނީ ކ. ގުރައިދޫގަ އެވެ.
ކަންގަތި އެވޯޑު މިރޭ ދީފައިވަނީ ހަތަރު ޖަރަޖައަކަށް ބަހާލައިގެން 18 ކައުންސިލަކަށެވެ.
- ގަދަހަމާންތި ދަރަޖަ- އިންޑެކްސްގެ ނަތީޖާއަށް ބަލައި އަތޮޅު ކައުންސިލްތަކަށް ދޭ އެންމެ މަތީ ތިން އެވޯޑް
- 1 ވަނަ ފުވައްމުލަކު އަތޮޅު ކައުންސިލް
- 2 ވަނަ ކޮޅުމަޑުލު އަތޮޅު ކައުންސިލް
- 3 ވަނަ މިލަދުންމަޑުލު އުތުރުބުރީ އަތޮޅު ކައުންސިލް
- ރަނަހަމާންތި ދަރަޖަ- އިންޑެކްސްގެ ނަތީޖާއަށް ބަލައި ރަށު ކައުންސިލްތަކަށް ދޭ އެންމެ މަތީ ތިން އެވޯޑް
- 1 ވަނަ ކ ހުރާ ކައުންސިލް
- 2 ވަނަ ށ ފޯކައިދޫ ކައުންސިލް
- 3 ވަނަ އއ އުކުޅަހު ކައުންސިލް
- މާރާދަ ހަނދާނީ ފިލާ- ވަކި ވަކި އިންޑެކްސްތަކުން އެންމެ ރަނގަޅު ނަތީޖާ ހޯދާ ރަށު އަދި އަތޮޅު ކައުންސިލްތަކަށް
- 5 އަތޮޅެއްގެ އަތޮޅު ކައުންސިލް
- 5 ރަށެއްގެ ރަށު ކައުންސިލް
- ކާންނާ ހަނދާނީ ފިލާ- ފާއިތުވެދިޔަ އިންޑެކްސްއާ އަޅާ ބަލާއިރު އެންމެ ބޮޑު ކުރިއެރުމެއް ހޯދި ރަށު އަދި އަތޮޅު ކައުންސިލަށް އަރުވާ ހަނދާނީ ފިލާ
- ކ ހުރާ ކައުންސިލް
- ނިލަންދެ އަތޮޅު އުތުރުބުރީ އަތޮޅު ކައުންސިލް
މިރޭ އެއްވަނަ ހޯދި އަތޮޅު ކައުންސިލާއި ރަށު ކައުންސިލަށް އެވޯޑު ހަވާލުކޮށްދެއްވީ ހޯމް މިނިސްޓަރު އަޒްލީން އަހުމަދެވެ.
ކައުންސިލްތަކުގެ ޕާފޯމަންސަށް ބަލައި 18 އެވޯޑެއް މިރޭ ވަނީ ދީފައިވާއިރު އެވޯޑުތައް ދިނުމުގައި ކައުންސިލްތައް ރޭންކު ކޮށްފައިވަނީ ކުރާ މަސައްކަތްތަކުގެ ލިޔެކިޔުންތައް އެލްޖީއޭގެ ގަވާއިދާ އެއްގޮތަށް އެ އިދާރާއަށް ހުށަހަޅާފައިވާ ކައުންސިލްތަކުގެ ނަތީޖާއަށް ބެލުމަށްފަހު ކަމަށް އެލްޖީއޭއިން ވަނީ ބުނެފަ އެވެ.