އަމީތާބް ބައްޗަން ފެނިގެންދިޔަ 1978 ވަނަ އަހަރު ނިކުތް ފިލްމު "ޑޮން"، ފިލްމު ސީރީޒް ފްރެންޗައިޒަކަށް ހަދާ ފުރަތަމަ ރީމޭކް ފިލްމެއް ނެރުނީ 2006 ގަ އެވެ. ޝާރުކް ހާން ފެނިގެންދިޔަ އެ ފިލްމު ޑައިރެކްޓުކުރީ ފަރްހާން އަކްތަރް އެވެ. އޭގެ ފަހުން 2011 ވަނަ އަހަރު "ޑޮން 2" ގެ ނަމުގައި ހަމަ ފަރްހާން ޑައިރެކްޓުކުރި އިތުރު ފިލްމެއް ނުކުތެވެ. މި ދެ ފިލްމަށްވެސް ބެލުންތެރިންގެ ބޮޑު ތަރުހީބެއް ލިބުނެވެ.
ޑޮން 2 ނިންމާލިއިރު އެ ފިލްމު ސީރީޒްގެ ތިން ވަނަ ފިލްމެއް އަންނާނެކަމުގެ އިޝާރާތެއް ވަނީ ދީފަ އެވެ. މިހާރު އެ ފިލްމުގެ މަސައްކަތް ފެށުނީހެން ހީވެ އެވެ.
ޑޮން 3 ފަރްހާން ހަމައެކަނި ޑައިރެކްޓުކުރާނީ އެއް ނޫނެވެ. ފިލްމުގައި ހާއްސަ ރޯލަކުން މިފަހަރު އޭނާވެސް ފެނިގެންދާނެ އެވެ. ފިލްމުގެ ޓީމުގެ މެމްބަރަކު ހާމަކުރިގޮތުގައި ފަރްހާން ފެނިގެންދާނީ ކޮޕެއް ނުވަތަ ފުލުހެއްގެ ރޯލުންނެވެ. ނަމަވެސް މި ހަބަރު އަދި ފަރްހާން ކަށަވަރުކޮށްދީފައެއް ނުވެ އެވެ.
ބީ ޓައުންގެ ރިޕޯޓުތައް ބުނާގޮތުން ފަރްހާން މިހާރު އަންނަނީ އެ ފިލްމުގެ ސްކްރިޕްޓުގެ މަސައްކަތް ކުރަމުންނެވެ. މިފަހަރުގެ ފިލްމުގައިވެސް ފެނިގެންދާނީ ހަމަ ޝާރުކް އެވެ. ސްކްރިޕްޓުގެ މަސައްކަތް ކުރުމަށް ފަރްހާން އެކްޓިންގެ ދާއިރާއިން ބްރޭކެއް ނަގާފައިވާ ކަމަށްވެސްވެ އެވެ.
ފިލްމުގެ ބަތަލާއަކަށް ފެނިގެންދާނެ ތަރިއެއް އަދި ކަށަވަރުވެފައެއް ނުވެ އެވެ. މި ފިލްމު ސީރީޒްގެ ފުރަތަމަ ދެ ފިލްމުގައި ބަތަލާއަކަށް ފެނިގެންދިޔައީ ބަތަލާ ޕްރިޔަންކާ ޗޯޕްރާ އެވެ. މި ފިލްމުގައި ޕްރިޔަންކާ ނުފެންނާނެކަމަށް މީގެ ކުރިން ހަބަރު ފެތުރުނެވެ. މި ފިލްމުގައި ފެނިގެންދާނީ މުޅިން އާ ކާސްޓެއްކަމަށް ބެލެވެ އެވެ.
މި ފިލްމުގެ ޝޫޓިން ފަށާނީ އަންނަ އަހަރު މެދު ތެރޭގަ އެވެ. ބެލުންތެރިންނާ ހަމައަށް އަންނާނެ ކަމަށް ބެލެވެނީ 2020 ގަ އެވެ.