ބޮޑު ހަމަނުޖެހުންތަކަށްފަހު މިއަހަރު ސިނަމާއަށް ގެނެސްދިން ކުޅަދާނަ ޑައިރެކްޓަރު ސަންޖޭ ލީލާ ބަންސާލީގެ ފިލްމު "ޕަދްމާވަތް" އަކީ މިއަހަރު މިހާތަނަށް އެންމެ ބޮޑު ކާމިޔާބީއެއް ހޯދި ބޮލީވުޑްގެ ފިލްމެވެ. މިދިޔަ ޖެނުއަރީ މަހު 25 ގައި މި ފިލްމު ސިނަމާތަކުގައި ދައްކަން ފެށި ހިސާބުން ފެށިގެން މިހާތަނަށް 500 ކަރޯޑު ރުޕީސް މި ފިލްމަށް ލިބިފައިވެ އެވެ.
އެންމެ ގިނަ ބަޔަކު އިންތިޒާރުކޮށްގެން ތިބީ ސިނަމާތަކުގައި މި ފިލްމު ދައްކާ ނިމުމުން އެންމެ އަވަހަށް މި ފިލްމު ފެނިގެންދާނީ ޓީވީ އިން ކަމަށެވެ. ނަމަވެސް ޓީވީ އިން ދެއްކުމުގެ ކުރިން މި ފިލްމު މިސްރާބުޖެހީ އެހެން ދިމާލަކަށެވެ. އޮންލައިންކޮށް ފިލްމު ސްޓްރީމް ކުރެވޭނެ ގޮތް ހެދުމަށެވެ.
ދެ މަސް ދުވަސް ވަންދެން ސިނަމާތަކުގައި ދެއްކުމަށްފަހު މިހާރު މި ފިލްމު އޮންލައިން ވީޑިއޯ އޮން ޑިމާންޑް ހިދުމަތްދޭ، "އެމެޒޯން ޕްރައިމް ވީޑިއޯ" އިން ސްޓްރީމް ކުރެވޭނެ ގޮތް ވަނީ ހަދާފަ އެވެ.
މިކަމާއި ގުޅިގެން އެމެޒޯން ޕްރައިމް ވީޑިއޯގެ އިންޑިއާ ކޮންޓެންޓުތަކުގެ ޑިރެކްޓަރު ވިޖޭ ސުބްރަމާނިއަމް ބުނީ އެންމެފަހުގެ އެންމެ ރަނގަޅު އަދި އެންމެ ގިނަ ބަޔަކު އިންތިޒާރުކުރާ ކޮންޓެންޓުތައް އެ ހިދުމަތް ބޭނުންކުރާ ފަރާތްތަކަށް ގެނެސްދިނުމަކީ އަބަދުވެސް އިސްކަންދޭ ކަމެއް ކަމަށާއި އެގޮތުން ސަންޖޭ ލީލާ ބަންސާލީގެ ޕަދްމާވަތްގެ އެމެޒޯން ޕްރައިމް އިން ސްޓްރީމްކުރެވޭ ގޮތް ވުމަކީ ބޮޑު ކާމިޔާބީއެއްގެ ގޮތުގައި ދެކޭ ކަމަށެވެ.
ދިޕިކާ ޕަދުކޯން އާއި ރަންވީރު ސިންހް އަދި ޝާހިދު ކަޕޫރް ފެނިގެންދާ މި ފިލްމަކީ ބަންސާލީގެ އަމިއްލަ ޕްރޮޑަކްޝަން ހައުސް އާއި ވިއާކޮމް 18 މޯޝަން ޕިކްޗާސް ގުޅިގެން ގެނެސްދިން ފިލްމެކެވެ. ދުނިޔޭގެ އެކި ހިސާބުތަކުގައި މި ފިލްމު ދެއްކީ ޕެރެމައުންޓު ޕިކްޗާސްގެ ބެލުމުގެ ދަށުންނެވެ.