ރައްޔިތުން މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަހުލޫފްގެ މައްޗަށް ޓެރަރިޒަމްގެ ދައުވާ އުފުލައި، އޭނާގެ ބަންދުގެ މުއްދަތު އިތުރު ކުރުމަށް މިއަދު ކޯޓަށް ހާޒިރު ކުރުމަށް ނިންމައިފި އެވެ.
މަހުލޫފްގެ މައްޗަށް ޓެރަރިޒަމް ދައުވާގެ އިތުރަށް އިތުރު ތިން ދައުވާއެއް ވަނީ ކޮށްފަ އެވެ. މަހުލޫފްގެ މައްޗަށް ޓެރަރިޒަމްގެ ދައުވާ އުފުލާފައި ވަނީ ސުޕްރީމް ކޯޓުން 1 ފެބުރުއަރީގައި ނެރުނު އަމުރާ ގުޅިގެން އެ އަމުރުގައިވާ ބައެއް ފަރާތްތައް ދޫކޮށްލުމަށް ގޮވާލާ މާފުށީ ޖަލުކައިރީގައި އޭނާ އިސްވެ މުޒާހަރާ ކޮށްފައިވާތީ އެވެ. އިތުރު ދައުވާތައް މަހުލޫފްގެ މައްޗަށް ކޮށްފައި ވަނީ، އޭނާ ކުރެއްވި ދެ ޓްވީޓަކާ ގުޅިގެންނާއި މުޒާހަރާގެ ބައިވެރިންނަށް މާސްކް ބެހި މައްސަލައިގަ އެވެ.
މަހުލޫފްގެ ބަންދުގެ މުއްދަތު މިރެއަށް ހަމަވާނެ އެވެ. އެހެން ކަމުން އޭނާގެ ބަންދުގެ މުއްދަތު ޖެހުމަށް މިއަދު ހަވީރު 3:00 އަށް ކްރުމިނަލް ކޯޓަށް ހާޒިރުކުރާކަން މިހާރު ވަނީ ވަކީލުންނަށް އަންގައިފަ އެވެ.
އެސްއޯއީގެ ދަށުން ހައްޔަރުކުރި ސިޔާސީ ގިނަ ފަރާތްތަކާއި ކުރީގެ ރައީސް މައުމޫން އާއި އުއްތަމަ ފަނޑިޔާރު އަދި ފަނޑިޔާރު އަލީ ހަމީދުގެ މައްޗަށް ވެސް ޕީޖީ އިން ވަނީ އެކި ދައުވާތައް އުފުލައިފަ އެވެ. އަދި އެސްއޯއީގެ މުއްދަތު ހަމަވުމުގެ ކުރިން، އެބޭފުޅުންގެ ޝަރީއަތް ނިމެންދެން ބަންދު ކުރަން ކްރިމިނަލް ކޯޓުން ވަނީ މުއްދަތު ޖަހައިފަ އެވެ.