އިނގެރޭސިވިލާތުގެ މަޝްހޫރު އެކްޓްރެސް ރޭޗެލް ވައިސް 48އަށް އިތުރު ކުއްޖެއް ލިބެން އުޅޭކަން އިއުލާނުކޮށްފި އެވެ. އެހާ ދޮށީ އުމުރެއްގައި އޭނާ ބަލިވެއިނުމުން ގިނަ ބަޔަކު ޝައުގުވެރިވާ ކަމަކަށް މިކަން މި ވަނީ ވެފަ އެވެ.
ރޭޗެލް ކައިވެނިކޮށްގެން އުޅެނީ މަޝްހޫރު ޖޭމްސް ބޮންޑުގެ ރޯލު ކުޅޭ އެކްޓަރު ޑެނިއެލް ކްރެގްއާ އެވެ. މި ދެމީހުން ކައިވެނިކުރީ 2011 ގަ އެެވެ. މިއީ އެ ދެމަފިރިންނަށް ލިބޭ ފުރަތަމަ ކުއްޖާ އެވެ.
ނަމަވެސް އެހެން މީހަކާއި އިނދެގެން ރޭޗެލްގެ 11 އަހަރު ފިރިހެން ކުއްޖެ ހުރިއިރު، ޑެނިއެލްވެސް އެހެން މީހަކާއި އިނދެގެން 25 އަހަރުގެ އަންހެން ދަރިއަކު އެބަހުއްޓެވެ.
މި ދެމަފިރިންނަށް ކުއްޖެ ލިބެން އުޅޭކަން ކަށަވަރުކޮށްދިނީ ނިއު ޔޯކް ޓައިމްސްއަށް ދިން އިންޓަވިއުއެއްގަ އެވެ.
ކައިވެންޏަށް އަށް އަހަރުވީއިރު ގިނަ އިންޓަވިއުތަކެއްގައި މި ދެމަފިރިން ވަނީ ދެ މީހުން ވަރަށް އުފަލުގައި އުޅޭކަމަށް ބުނެފަ އެވެ.
ރޭޗެލް މިހާރު ތައްޔާރުވަމުން އަންނަނީ އޭނާގެ ކުރިއަށް އޮތް ފިލްމު "ޑިސްއޮބީޑިއެންސް" ޕްރޮމޯޓުކުރުމަށެވެ. ނައޯމީ އެލްޑަމޭންގެ ވާހަކައަށް ތައްޔާރުކުރި މި ފިލްމުގައި އެކްޓުކުރުމުގެ އިތުރަށް އޭނާ ވަނީ ޕްރޮޑިއުސްވެސް ކޮށްފަ އެވެ.