ބޮލީވުޑްގެ މަޝްހޫރު ބަތަލް ސަންޖޭ ދަތްގެ ހަޔާތުގެ މައްޗަށް ތައްޔާރުކުރާ ބަޔޮޕިކް ފިލްމުގެ ޓީޒާ ޓްރެއިލާ މިހާރު ވަނީ އާންމުކޮށްފަ އެވެ. ޓީޒާ އާންމު ކުރުމުން އެންމެ ގިނަ ބަޔަކު ކުރި ސުވާލަކީ ފިލްމުން އެ ފެންނަނީ ހަމަ ސަންޖޭ ހެއްޔެވެ. ނުނީ މި ފިލްމުގައި ސަންޖޭގެ ރޯލުން ފެނިގެންދާ ރަންބީރް ކަޕޫރް ހެއްޔެވެ.
ޓީޒާ އިން ފެންނަނީ ރަންބީރް އެވެ. އެއް މިނެޓް 26 ސިކުންތައް ދެމިގެންދާ މި ޓީޒާގައި ސަންޖޭ އޭނާގެ ހަޔާތުގެ އެކި ދުވަސްވަރު ހަމަ އޭނާ ހުރިގޮތަށް ރަންބީރް ފެނެ އެވެ. ދެ މީހުންވެސް ވަރަށް ވައްތަރެވެ. ހިވަނީ ހަމަ އެކަކު ފެންނަހެނެވެ. ޓުވިޓާގައި ބީ-ޓައުންއާއި ބެހޭގޮތުން މިހާރު އެންމެ ގަދަޔަށް ދެކެވެމުން އަންނަނީ މި ވާހަކަ އެވެ.
"ސަންޖޫ" ގެ ނަން ދީފައިވާ މި ފިލްމުގައި ސަންޖޭ އެންމެ ޅައިރު ކުޅުނު ފިލްމު "ރޮކީ" ގައި އޭނާ ހުންނަގޮތާއި، 1993 ވަނަ އަހަރު މުމްބާއީގައި ބޮން ގޮއްވި މައްސަލާގައި ފަސް އަހަރުގެ ޖަލު ހުކުމެއް ތަންފީޒުކުރުމަށްފަހު 2016 ވަނަ އަހަރު އޭނާ ޖަލުން މިނިވަން ވަންދެން ހިނގި ކަންތައްތައްވެސް ގެނެސްދޭނެ އެވެ.
މިހާރު ބެލުންތެރިން އެންމެ ގިނައިން ކުރަމުން އަންނަ ސުވާލަކީ ސަންޖޭގެ ހަޔާތުގައި ހިނގި ގިނަ ކަންތައްތަކެއް ގެނެސްދޭނަމަ ސަންޖޭއާއި ބޮލީވުޑްގެ މަޝްހޫރު ބަތަލާއި މާދުރީ ޑިކްޝިޓްއާއި އޮތް ލޯބީގެ ގުޅުންތަކުގެ ވާހަކަތައް މި ފިލްމުގައި ގެނެސްދޭނެ ހެއްޔެވެ.
ފިލްމުތަކުގައި މި ދެތަރިންގެ ފަރާތުން ފެނުނު ޖާދުވީ ކެމިސްޓްރީގެ އަވާގައި އެތައް ހާސް ބަޔަކު ޖެއްސުވިއިރު، މި ދެތަރިންގެ މެދުގައި ވަރުގަދަ އޮފް ސްކްރީން ކެމިސްޓްރީއެއްވެސް އޮތެވެ. މި ދެ ތަރިންގެ ލޯބީގެ ގުޅުން މާ ގިނަ ދުވަސްކަތަކެއް ނުވެ ނިމުމަކަށް އައީ މަސްތުވާތަކެތީގެ ޝިކާރައަކަށް ސަންޖޭވެ، މާދުރީގެ އާއިލާ މީހުން އެ ގުޅުމާއިމެދު ނުރުހެން ފެށުމުންނެވެ.
ގިނަ އަހަރުތަކަކަށްފަހު މި ދެ ތަރިން މިހާރު ވަނީ އެއްކޮށް ފިލްމެއް ކުޅުމަށްވެސް އެއްބަސްވެފަ އެވެ. ކަރަން ޖޯހަރުގެ ކުރިއަށް އޮތް ފިލްމު "ކަލަންކްް" ގައި މި ދެތަރިން ފެނިގެންދާނެ އެވެ. ކަރަންގެ ޑްރީމް ޕްރޮޖެކްޓު، މި ފިލްމު ކުޅުމަށް ސަންޖޭއާއި މާދުރީ އެއްބަސްވީވެސް ޝަރުތަކަކާއެކު އެވެ. އެގޮތުން އެ ދެމީހުން އެކުގައި ކުޅޭ މަންޒަރުތައް މަދުކުރުމަށް ޝަރުތުކޮށްފައިވެ އެވެ.
މި ފިލްމަކީ ރާޖްކުމާރް ހިރާނީ ލިޔެ އަދި ޑައިރެކްޓުކުރާ ފިލްމެކެވެ. ފިލްމުގައި ފެނިގެންދާ އިތުރުން ކާސްޓުންގެ ތެރޭގައި ޕަރޭޝް ރަވަލް އާއި މަނީޝާ ކޮއިރާލާ، ސޯނަމް ކަޕޫރް، އަނުޝްކާ ޝަރްމާ، ބޫމަން އިރާނީ އަދި ކަރިޝްމާ ތަންނާ ހިމެނެ އެވެ. ސިނަމާތަކުގައި ފިލްމު ދައްކަން ފަށާނީ އަންނަ ޖޫން މަހު 29 އިން ފަށައިގެންނެވެ.