ބޮލީވުޑްގެ އެކްޓާ އަދި ސަލްމާން ހާންގެ ކޮއްކޮ، ސޮހޭލް ހާން އޭނާގެ ފުރަތަމަ ޓީވީ ސީރީޒްގެ މަސައްކަތް މިހާރު ވަނީ ފަށާފަ އެެވެ. ރިޕޯޓުތައް ބުނާ ގޮތުން މި ސީރީޒް ޕްރޮޑިއުސް ކުރާނީ ސަލްމާނެވެ. މި ސީރީޒްއަކީ މަޝްހޫރު ރެސްލާ "ދަ ގްރޭޓް ގަމާ" ގެ ހަޔާތައް ތައްްޔާރުކޮށް ގެނެސްދޭ ސީރީޒްއެކެވެ.
މުމްބާއީ މިރޯގައި ބުނެފައިވާ ގޮތުގައި މި ސީރީޒްގެ ވާހަކަ ލިޔެ އަދި ޑައިރެކްޓުކުރަނީ ޕުނީތް އިސާރް އެވެ. ސީރީޒްގެ ޕައިލެޓް އެޕިސޯޑު މިދިޔަ އަހަރު ޝޫޓުކޮށް، ސީރީޒް ގެނެސްދިނުމަށް ހަމަޖެހިފައިވާ ޗެނަލުން ދެންހުރި އެޕިސޯޑުތަކުގެ މަސައްކަތްކުރަން ފުރުސަތުދީފައިވާ ކަމަށްވެސް ބުނެފައިވެ އެވެ. އެއީ ކޮން ޗެނަލެއް ކަމެއް އަދި ހާމަކޮށްފައެއް ނުވެ އެވެ.
މިހާރު ކުރަމުން އަންނަނީ ސީރީޒްއަށް ބޭނުންވާ އިތުރު ކާސްޓުން ނެގުމުގެ މަސައްކަތެވެ. އޮންސެޓް ޝޫޓިންތަކެއް ހިމެނޭ މި ސީރީޒްގެ ޝޫޓިންތައް ކުރިއަށްދަނީ މުމްބާއި އަދި ލަންޑަންގަ އެވެ. ނަމަވެސް ސީރީޒް ގެނެސްދޭނީ ޕަންޖާބުގައި ހިނގި ކަމެއްގެ ގޮތުގަ އެވެ.
ގަމާއަކީ ޕަންޖާބުގެ އަވަށަކަށް އުފަންވި މީހެކެވެ. އޭނާއަށް މަޝްހޫރުކަން ލިބުނީ ބޮޑު މުބާރާތެއްގައި ބައިވެރިވެ ކާމިޔާބުވީ ހިސާބުންނެވެ. ގަމާ ވަނީ ޔޫރަޕްގައި އޮތް ބައިނަލްއަގުވާމީ ވްރެސްލިން މުބާރާތެއްގައިވެސް ބައިވެރިވެފަ އެވެ.
ސޮހޭލް މިހާރު އަންނަނީ ސީރީޒް ކުޅުމަށް އޭނާގެ ހަށިގަނޑަށް ގެންނަންޖެހޭ ބަދަލުތައް ގެނައުމުގެ މަސައްކަތް ކުރަމުންނެވެ. ސީރީޒްގެ ނަމެއް އަދި ރަސްމީކޮށް ހާމަކޮށްފައެއް ނުވެ އެވެ.
މި ސީރީޒް ސަލްމާން ޕްރޮޑިއުސްކުރާއިރު، އޭނާ މިހާރު އަންނަނީ މުމްބާއީ ފުލުހުންނާއި ގުޅޭ ޓީވީ ސީރީޒެއް ގެނެސްދިނުމުގެ މަސައްކަތްވެސް ކުރަމުންނެވެ. މީގެ އިތުރުން އަންނަ ޖޫން މަހު ގެނެސްދޭ އޭނާގެ ރިއަލިޓީ ޓީވީ ޝޯ "ދަސް ކާ ދަމް" ގެ މަސައްކަތްވެސް ވަނީ ފަށާފަ އެވެ.