"ފާސްޓް އެންޑް ފިއުރިއަސް" ގެ ކާމިޔާބު އަށް ފިލްމެއް މިހާތަނަށް ގެނެސްދީފައިވެ އެވެ. ކުރިއަށް އޮތް މި ފިލްމު ފްރެންޗައިޒްގެ ނުވަ ވަނަ ފިލްމަށް އިންތިޒާރު ކުރެވެމުން އަންނައިރު، ފިލްމުގައި ލީޑުން ފެނިގެންދާ އެކްޓާ ވެން ޑީސެލް ބުނީ އެ ފިލްމަކީ މި ފްރެންޗައިޒްގައި ގެނެސްދޭ އެންމެ ވަރުގަދަ ފިލްމަށްވާނެ ކަމަށެވެ.
އެމެރިކަން ޓޯކް ޝޯ "ޓުޑޭ" އަށް ދިން އިންޓަވިއުއެއްގައި ވިން، 50، ބުނީ ނުވަ ވަނަ ފިލްމު ޑައިރެކްޓުކުރާނީ މި ފްރެންޗައިޒްގެ ކުރީގެ ތިން ފިލްމެއް ޑައިރެކްޓުކޮށްފައިވާ ޖަސްޓިން ލިން ކަމަށެވެ. ދިހަ ވަނަ ފިލްމުވެސް ޑައިރެކްޓުކުރާނީ ޖަސްޓިން އެވެ.
"މި ފިލްމު ވަރުގަދަވާނެ. މަސައްކަތް ފަށަން މިހުރީ ކެތްމަދުވެފަ." ވިން އިންޓަވިއުގައި ބުންޏެވެ.
ވިން ބުނީ މިފަހަރު ފިލްމު ޝޫޓުކުރާ ގޮތަށް އަދި ހަމަޖެހިފައި އޮތީ އެފްރިކާގައި ކަމަށެވެ. މީގެ ކުރިން މި ފިލްމު ސީރީޒްގެ ފިލްމުތައް ޝޫޓުކޮށްފައި ވަނީ ތަފާތު އެކި ގައުމުތަކުގަ އެވެ. ބްރެޒިލް، އިނގެރޭސިވިލާތް، ސްޕެއިން، ޖަޕާން، މެކްސިކޯ އަދި ޔޫއޭއީގައިވެސް ޝޫޓުކޮށްފައިވެ އެވެ.
މި ފިލްމު ސިނަމާތަކަށް ގެނައުމަށް ނިންމާފައި އޮތީ އޭޕްރީލް 10، 2020 ގަ އެވެ. މުހިންމު ރޯލުތަކުން މިޝޭލް ރޮޑްރިގޭޒް، ޓައިރީސީ ގިބްސަން، ކްރިސް ބްރިޖްސް، ނެޓަލީ އެމަނުއެލް، ޖޭސަން ސްޓޭތޮމް އަދި ޑުވޭން ޖޯންސަން ފެނިގެންދާނެ އެވެ. ކުރީގެ ފިލްމުތަކުގައިވެސް މި ތަރިން ފެނިގެންގޮސްފައިވެ އެވެ.
ފާސްޓް އެންޑް ފިއުރިއަސްއަކީ ޔުނިވާސަލް ޕިކްޗާސް އިން ގެނެސްދޭ އެންމެ ބޮޑު ފިލްމު ފްރެންޗައިޒް އެވެ. މި ފްރެންޗައިޒްގެ ފިލްމުތަކަށް ބޮކްސް އޮފީހުގައި ފަސް ބިލިއަން ޑޮލަރަށް ވުރެ ބޮޑު އާމްދަނީއެއް ލިބިފައިވެ އެވެ. ދިހަ ވަނަ ފިލްމާއެކު މި ފްރެންޗައިޒްގެ ފިލްމުތައް ގެނެސްދިނުން ހުއްޓާލަން ނިންމާފައިވާއިރު، މި ފްރެންޗައިޒްއަކީ ހަ ވަނައަށް އެންމެ ބޮޑު އާމްދަނީއެއް ހޯދާފައިވާ ފިލްމު ސީރީޒް އެވެ.