ސަރުކާރު ވައްޓާލަން އުޅުން ކަމުގެ ތުހުމަތުގައި ފުލުހަށް ހާޒިރުވާން އެންގި ކުރީގެ ރައީސް މައުމޫން އަބްދުލް ގައްޔޫމްގެ ދަރިކަނބަލުން ޔުމްނާ މައުމޫން މިއަދު ފުލުހުންގެ އިދާރާއަށް ހާޒިރުވުމުން ވަކީލަކު ހޯދަން ފަސް ދުވަހުގެ މުއްދަތެއް ދީފި އެވެ.
ޔުމްނާ ފުލުހަށް ހާޒިރުކޮށްފައިވަނީ މިއަދު ހަވީރު، 4:50 އަށެވެ. ފުލުހުންގެ އިދާރާއަށް އެކަމަނާ މިއަދު ވަޑައިގެންނެވީ ވަކީލަކު ނެތި އެވެ.
ތުހުމަތުކުރެވޭ މައްސަލާގައި ސުވާލުކުރުމަށް އިއްޔެ ވެސް ޔުމްނާ ފުލުހަށް ހާޒިރުކުރި އެވެ. އަދި މިއަދަށް ވަކީލަކު ހަމަޖައްސައި ވަކީލަކާއެކު ހާޒިރުވުމަށް އިއްޔެ ފުލުހުން އެންގި ނަމަވެސް ޔުމްނާ ވަނީ އެހާ ކުރު މުއްދަތެއްގެ ތެރޭގައި ވަކީލަކު ހަމަޖައްސަން ދަތި ކަމަށް ވިދާޅުވެފަ އެވެ. އަދި ވަކީލަކު ހަމަޖައްސަން އިތުރު ދުވަސް ދެއްވުމަށްވެސް ޔުމްނާ ވަނީ އިއްޔެ ފުލުހުގައި އެދިވަޑައިގެންފަ އެވެ. ނަމަވެސް އެކަމަނާ އިއްޔެ އެކަމަށް ދެންނެވުމުން މުއްދަތު އިތުރުކޮށްދީފައި ނުވާތީ ޔުމްނާ މިއަދު ވެސް ފުލުހަށް ހާޒިރުވީ ވަކީލަކު ނެތި އެވެ. ވަކީލަކު ހަމަޖައްސަން އިތުރު ފަސް ދުވަސް ފުލުހުން ދިނީ އެހެންވެ އެވެ.
ބޮޑު ބޭބޭފުޅު ރައީސް ޔާމީންގެ ސަރުކާރު ވައްޓާލަން އުޅުނު ކަމުގެ ތުހުމަތު ޔުމްނާއަށް ކޮށްފައިވާއިރު އެ ތުހުމަތުގައި އެކަމަނާގެ ބައްޕާފުޅާއި ކޮއްކޯފުޅުގެ އިތުރުން ފިރިކަލުންވެސް މިހާރު ވަނީ ހައްޔަރުކޮށްފަ އެވެ.