މާލޭގައި އަންނަ އަތޮޅު ޓީމުތަކަށް ހާއްސަކޮށް ކުރިން ބޭއްވި ޒޯން ޗެމްޕިއަންސް ލީގް ކާމިޔާބު ކުރެވިފައި ވުމަކީ ފޯކައިދޫ ޓީމަށް ލިބުނު ބޮޑު ހިތްވަރެއް ކަމަށް ށ. ފޯކައިދޫ ޓީމުން ބުނެފި އެވެ.
ފޯކައިދޫ ޓީމުގެ މެނޭޖަރު އިސްމާއިލް އާސިފް ބުނީ 2007 ވަނަ އަހަރުގެ ޒޯން ޗެމްޕިއަންސް ލީގް ކާމިޔާބު ކުރި ޓީމުގެ ކުޅުންތެރިންނާއި މިހާރުގެ ކުޅުންތެރިން ތިބީ ވަރަށް ބޮޑު އަޒުމެއްގައި ކަމަށެވެ.
"މިހާރުގެ ކުޅުންތެރިންނާ ޒޯން ޗެމްޕިއަންސް ލީގް ކާމިޔާބު ކުރި އޭރު މި ދަނޑުގައި ކުޅެލަން ލިބުނު ކުޅުންތެރިންނާ ހުރިހާ ކުޅުންތެރިން ވަރަށް އެގްޒައިޓް ވެފަ ތިބީ."
ފޯކައިދޫ ވަނީ މިނިވަން ޗެމްޕިއަންޝިޕްގެ ފުރަތަމަ މުބާރާތުގެ ސެމީ ފައިނަލަށް ދަތުރު ކޮށްފަ އެވެ. ނަމަވެސް ޖެހިގެން އައި 2016 ވަނަ އަހަރު އެ ޓީމަށް ލިބުނީ އެކަށީގެންވާ ކާމިޔާބެއް ނޫނެވެ. އާސިފް ވިދާޅުވީ އެ އަހަރުގެ ނާކާމިޔާބުން ފަށައިގެން، ފޯކައިދޫ އަށް މިނިވަން ޗެމްޕިއަންޝިޕް ގެނައުމަށް އަޒުމު ކަނޑައަޅައިގެން މަސައްކަތް ފެށި ކަމަށެވެ.
އޭނާ ބުނީ މި އަހަރުގެ މުބާރާތަށް ރާއްޖޭގެ އެކި ހިސާބުތަކުންވެސް ކުޅުންތެރިން ގެނެސް ފޯކައިދޫއިން ރަނގަޅު ޓީމެއް ބިނާ ކޮށްފައިވާނެ ކަމަށެވެ. ނަމަވެސް ޓީމުގެ 30 ކުޅުންތެރިންގެ ސްކޮޑްގައި ރަށަށް ނިސްބަތްވާ ގިނަ ކުޅުންތެރިން ހިމެނޭނެ ކަމަށް އޭނާ ފާހަގަ ކުރި އެވެ.
"2016 ގެ ނާކާމިޔާބުން ފެށިގެން އަޅުގަނޑުމެން އަޒުމު ކަނޑައެޅީ އަޅުގަނޑުމެން މަސައްކަތް ނިންމާނީ މުބާރާތުގެ ތަށި ނާގަފައޭ،" އާސިފް ބުންޏެވެ. "މި މަސައްކަތް ކާމިޔާބު ކުރުމަށްޓަކައި ރާއްޖޭގެ އެކި ހިސާބުތަކުން ހަމަ ރަނގަޅު ކުޅުންތެރިން ހޯދާ މިހާރު މިއޮތީ ވަރަށް ބޮޑަށް ތައްޔާރު ވެވިފަ މިއޮތީ."
އޭނާ ބުނީ މިނިވަން ޗެމްޕިއަންޝިޕަށް ހާއްސަކޮށް ޓީމު އެކުލަވާލުމަށް ރަށުގައި މުބާރާތެއް ކުރިއަށް ގެންގޮސް ފެންވަރު ވަޒަން ކުރުމުގެ މަސައްކަތްވެސް ކޮށްފައި ވާނެ ކަމަށެވެ.