ކުރީގެ ރައީސް މުހައްމަދު ނަޝީދުގެ ސަރުކާރުގެ އިސްލާމިކް މިނިސްޓަރު އަދި އަދާލަތު ޕާޓީގެ މެންބަރު ޑރ. އަބްދުލް މަޖީދު އަބްދުލްބާރީގެ ހާލު ވަރަށް ބޮޑަށް ދެރަ ވެއްޖެ އެވެ. އޭނާ ހާލު ސީރިޔަސްވެ ފަރުވާ ދެމުންދާކަން އާއިލާ މެންބަރަކު ވަނީ "އަވަސް" އަށް ކަށަވަރުކޮށްދީފަ އެވެ.
ސްރީލަންކާއަށް ވަޑައިގެން އުޅުއްވަނިކޮށް ސްޓްރޯކެއް ޖެހިގެން އޭނާއަށް ފަރުވާ ދޭން ފެށީ މިދިޔަ ހުކުރު ދުވަހުގަ އެވެ. އޭރު އޭނާ ހޭ ނާރާ އެތަށް އިރަކު އޮންނެވުމަށް ފަހު ފަހުން ވަނީ ކޮންމެވެސް ވަރަކަށް ސްޓޭބަލްވެފަ އެވެ. ނަމަވެސް މަޖީދުގެ ހާލު އަނެއްކާވެސް ވަރަށް ބޮޑަށް ގޯސްވެ، އޭނާ ވަނީ އައިސިޔޫގެ ވެންޓިލޭޓަރުގައި ބާއްވާފަ އެވެ.
ސްޓްރޯކް ޖެހުމާ ގުޅިގެން މަޖީދު މީގެ ކުރިން ވެސް ވަނީ އޮޕްރޭޝަންތަކެއް ކުރައްވާފަ އެވެ. މަޖީދަކީ ރާއްޖޭގައި އުފެދުނު ވަރަށް ބޮޑު ދީނީ އިލްމުވެރިއެކެވެ. އޭނާއަކީ ގުރުއާން ތަފުސީރުގެ ރޮނގުން ޕީއެޗްޑީ ހައްދާފައިވާ ބޭފުޅެކެވެ.