ކުއްލި ގޮތަކަށް އަވަހާރަވި ކުރީގެ އިސްލާމިކް މިނިސްޓަރު ޑރ. އަބްދުލް މަޖީދު އަބްދުލް ބާރީގެ ލަފާއަށް އެއް ބިލިއަން ޑޮލަރުގެ ބިޔަ މަޝްރޫއެއް އެމްޑީޕީގެ ސަރުކާރުން ހުއްޓުވި ކަމަށް އެ ސަރުކާރުގެ ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ޑރ، މަޖީދުގެ ހަނދާންގައި މިރޭ ބޭއްވި ތައުބީން ޖަލްސާގައި ވާހަކަ ދައްކަވަމުން އަސްލަމް ވިދާޅުވީ، ސަެުކާރުގެ ސިޔާސަތުތައް ހުންނަން ޖެހޭނީ ދީނަށް ފުށުނާރާ ގޮތަކަށް ކަމަށް އަބަދުވެސް މަޖީދު ވިދާޅުވާ ކަމަށެވެ. އިގްތިސޯދު ބިނާވެފައި އޮންނަން ޖެހޭނީ އިސްލާމީ ހަމަތަކުގެ މަތީގަ ކަމަށް ވިދާޅުވާ ކަމަށެވެ.
ރާއްޖޭގެ އިގްތިސޯދަށް ބޮޑު އިންގިލާބެއް ގެންނާނެ ފަދަ އެއް ބިލިއަން ޑޮލަރުގެ މަޝްރޫއުއެއް މަޖީދުގެ ލަފާގެ މަތިން ސަރުކާރުން ދޫކޮށްލެއްވި ކަމަށާއި އެ މަޝްރޫއު ދޫކޮށްލީ އޭގެ ސަބަބުން ރާއްޖޭގައި ކަސީނޯ އާންމުވެދާނެ ކަމަށް ދެކެވަޑައިގެން އެކަމާ ވަކާލާތު މަޖީދު ކުރެއްވުމުން ކަމަށް އަސްލަމް ވިދާޅުވި އެވެ.
ރާއްޖޭގެ ޓޫރިޒަމް ޕްރޮމޯޓްކުރުމަށް ބޭނުން ކުރަމުން ދިޔަ "ސަނީ ސައިޑް އޮފް ލައިފް" ސްލޯގަން ރީބްރޭންޑްކޮށް "މޯލްޑިވްސް މޭޑް އިން ނޭޗާ"އަށް ބަދަލުކުރަން ހުށަހެޅި ހުށަހެޅުން ވެސް ހުއްޓުވީ ޑރ. މަޖީދުގެ ލަފާގެ މަތިންކަން އަސްލަމް ވިދާޅުވި އެވެ. އެ ސްލޯގަންއިން ބޮޑަށް ދޭހަވަނީ ރާއްޖެއަކީ އަމިއްލަ އުފެދިފައިވާ ގައުމެއް ކަމަށާއި ﷲގެ ކުޅަދުންވަންތަކަމުން އުފެއްދެވި ގައުމެއް ނޫން ކަމަށް ޑރ. މަޖީދު ދެކެވަޑައިގެންނެވި ކަމަށް އަސްލަމް ވިދާޅުވި އެވެ.
އެފަދަ ލަފާތަކުގެ ސަބަބުން ޑތ. މަޖީދަށް އޮތް އިހްތިރާމް އިހުނަށްވުރެ ބޮޑުވެގެން ދިޔަކަން އޭނާ ފާހަގަކުރެއްވި އެވެ. އަދި ކެބިނެޓްގައި ޑރ. މަޖީދު ދީނީ ލަފާއެއް ދެއްވުމުން އޭގެ މައްޗަށް އެއްޗެއް ބުނުމުގެ އެހެން މިނިސްޓަރެއްގެ ހައިސިއްޔަތެއް ނޯންނާނެ ކަމަށް ވެސް އަސްލަމް ވިދާޅުވި އެވެ.
އަދާލަތު ޕާޓީގެ ނައިބު ރައީސް އަލީ ޒާހިރު ވިދާޅުވީ، ޑރ. މަޖީދަކީ ހައްގު ބަސް ވިދާޅުވުމަކީ އެއްވެސް ވަރަކަށް ފަހަތަށް ޖެހިވަޑައިގެންނެވި އިލްމްވެރިއެއް ނޫން ކަމަށެވެ. ރާއްޖޭގެ ގިނަ އިލްްވެރިންނަކީ އެކި ސަބަބުތަކާހުރެ ހައްގު ބަސް ވިދާޅުވުމަށް ފަހަތަށް ޖެހިވަޑައިގަންނަވާ ބޭފުޅުން ކަމަށާއި ނަމަވެސް އެކުގައި ޑރ. މަޖީދު ދެއްކެވީ މިސާލެއް ކަމަށެވެ. ގައުމަށް ބޭނުން ވަނީ ޑރ. މަޖީދު ފަދަ އިލްމްވެރިންކަން އަލީ ޒާހިރު ފާހަގަކުރެއްވި އެވެ.
މަކުނުދޫ ދާއިރާގެ މެންބަރު އަނާރާ ނައީމް ވަނީ އޭނާއާއެކު ޑރ. މަޖީދު އަވަހާރަވުމުގެ 10 ދުވަހުގެ ކުރިން ކުރެވުނު ބައްދަލުވުމުގެ ވާހަކަތައް ހިއްސާކުރައްވާފަ އެވެ. އަނާރާ ވިދާޅުވީ، ރާއްޖޭގެ މިނިވަން މުއައްސަސާތަކުގެ ދައުރު ވަރަށް ފުރިހަމަ ގޮތެއްގައި ކަނޑައަޅާފައިވީ ނަމަވެސް އެ ދައުރު މުއައްސަސާތަކަށް އަދާނުކުރެވޭކަން ޑރ، މަޖީދު ފާހަގަކުރެއްވި ކަމަށެވެ. އެހެންވެ މުއައްސަސާތައް އިސްލާހުކުރުމަކީ މުހިންމު މަސައްކަތެއްކަން ފާހަގަކުރެއްވި ކަމަށެވެ. ޝަރުއީ ދާއިރާ ވެސް އިސްލާހުވެގެން ދާނީ އޭރަށް ކަމަށް ވިދާޅުވި ކަމަށް އަނާރާ ވިދާޅުވި އެވެ.