ޕީއެސްޖީގެ ޓީމު އެކުލަވާލަނީ، ނޭމާއަކީ އެންމެ މުހިންމު ކުޅުންތެރިޔާކަން ދެނެގަނެގެން އޭނާއަށް ފަސޭހަ ވާނެ ގޮތަށް ކަމަށް، އެ ޓީމުގެ އާ ކޯޗް ތޯމަސް ޓްޗެލް ބުނެފި އެވެ.
ޕީއެސްޖީ ދޫކޮށް ނޭމާ، ރެއާލް މެޑްރިޑަށް ބަދަލުވާން އުޅޭ ވާހަކަ ދެކެވެ އެވެ. ނަމަވެސް ޓްޗެލް ބުނީ އޭނާ ނޭމާ އާ ވާހަކަ ދައްކާފައިވާ ކަމަށާއި އޭނާ ހުރީ ޕީއެސްޖީގައި މަޑުކުރާ ގޮތަށް ކަމަށެވެ.
"ނޭމާ އަކީ އާޓިސްޓެއް، އަހަރެން ޓީމު އެކުލަވާލާނީ އެންމެ ރަނގަޅު އޮނިގަނޑުގައި އޭނާއަށް ބޮޑަށް ފުރުސަތު ލިބޭނެ ގޮތަށް،" ޕީއެސްޖީގެ ކޯޗުގެ ގޮތުގައި އޭނާ ތައާރަފު ކުރުމަށް ބޭއްވި ނޫސް ކޮންފަރެންސްގައި ވާހަކަ ދައްކަމުން ޓްޗެލް ބުންޏެވެ. "އޭނާ އަކީ ދުނިޔޭގެ އެންމެ މޮޅު އެއް ކުޅުންތެރިޔާ އަހަރެމެންގެ އެންމެ މުހިންމު ކަމަކީ މެޗުތައް ކާމިޔާބު ކުރުން."
"އަހަރެން މިހާރު އޭނާ އާ ވާހަކަ ދައްކައިފިން، އޭނާ ހުރީ ވަރަށް ރަނގަޅަށް އަދި އަހަރެމެންގެ އެބަތިބި ހުނަރުވެރި އެހެން ކުޅުންތެރިންވެސް."
ޕީއެސްޖީގެ އެންމެ ބޮޑު އަމާޒަކީ، ޔޫރަޕްގެ ވަރުގަދަ ބާރަކަށް ވުމެވެ. މިދިޔަ ދެ އަހަރުވެސް ޗެމްޕިއަންސް ލީގްގެ ދެ ވަނަ ބުރަށްވުރެ ދުރަށް އެ ޓީމަށް ދެވިފައެއް ނުވެ އެވެ. ޓްޗެލް ބުނީ އޭނާގެ އެންމެ ބޮޑު އަމާޒާ ބެހޭގޮތުން ވާހަކަ ދައްކަން އަދި އަވަސް ކަމަށެވެ. މިހަރު އޭނާގެ މަސައްކަތަކީ ކުޅުންތެރިންނަށް މަސައްކަތް ކުރަން ފަސޭހަ މާހައުލެއް އުފެއްދުން ކަމަށް ޓްޗެލް ބުނެފި އެވެ.
ކުރީގެ ކޯޗް އުނައި އެމްރީ އަށް ދިމާވި އެންމެ ބޮޑު މައްސަލައަކީ، ކުޅުންތެރިން ރަނގަޅަށް މެނޭޖް ނުކުރެވުމެވެ.
ޓްޗެލް (ކ) ޕީއެސްޖީގެ ރައީސް ނާސެރު އަލް ޚަލަފީ (ވ) އާއެކު