މިދިޔަ ދެ މަސް ތެރޭގައި ޕޯސްޓުގެ ޒަރިއްޔާއިން ރާއްޖެއަށް ތަފާތު 24 ފަހަރުގެ މަތިން ރާއްޖެއަށް ޕާޓީ ޑްރަގް އެތެރެ ކުރަން އުޅެނިކޮށް އަތުލައިގެންފައިވާ ކަމަށް މޯލްޑިވްސް ކަސްޓަމްސް ސާވިސް އިން ބުނެފި އެވެ.
ކަސްޓަމްސް އިން ބުނީ ޕޯސްޓުން ގެންނަ ތަކެއްޗައް ހާއްސަ ކޮށްގެން މިދިޔަ މާޗު އަދި އޭޕްރީލް މަހުގެ ތެރޭގައި އެ ސާވިސް އިން ހިންގި އޮޕަރޭޝަންތަކެއްގައި ޕޯސްޓް ޕާރްސަލްތަކުގެ ތެރޭގައި ފޮރުވައިގެން ރާއްޖެ އެތެރެ ކުރަން އުޅެނިކޮށް 24 ފަހަރުގެ މަތިން މަސްތުވާތަކެތި އަތުލައިގެންފައިވާ ކަމަށެވެ.
އޭގެ ތެރޭގައި ޕާޓީ ޑްރަގެއް ކަމަށްވާ، އެކްސްޓަސީއާ، ހެރޮއިންއާ، އެމްފެޓަމައިންއާ، މެތަންފެޓަމައިން އާއި މެފެޑްރޯން އަދި މެތްމެތިނޯން ފަދަ ބާވަތްތައް ހިމެނޭ ކަމަށާއި އެތަކެތި އައިސްފައި ވަނީ އިނގިރޭސިވިލާތާއި ގްރީސް ބެލްޖިއަމް އަދި ނެދަލެންޑްސް އިން ކަމަށެވެ.
އެކި ފަހަރުގެ މަތިން އަތުލައިގަތް އެ މަސްތުވާތަކެތީގެ ބަރުދަނުގައި 1.74 ކިލޯ ހުރި ކަމަށް ކަސްޓަމްސް އިން ބުންޏެވެ. އަދި އެތަކެތި މިހާރު ވަނީ ފުލުހުންނާ ހަވާލުކޮށް މައްސަލަ އިތުރަށް ތަހުގީގު ކުރަމުންދާ ކަމަށް ވެސް ކަސްޓަމްސް އިން ބުންޏެވެ.