އިދިކޮޅު އެމްޑީޕީގެ ޓިކެޓްގައި ހއ. ދިއްދޫ ކައުންސިލަށް އިންތިހާބުވެފައިވާ އެ ކައުންސިލްގެ ރައީސް އަލީ ހާޝިމް ފުލުހުން ހައްޔަރުކޮށްފި އެވެ.
ހާޝިމް ހައްޔަރު ކުރީ، ރޭ މެންދަމުގެ ވަގުތުގައި އޭނާ ދިރިއުޅުއްވާ ގެ، ދިއްދޫ، ބުރުނި ބަލައި ފާސްކުރުމަށް ފަހު އެވެ. އެ ގެ ފާސްކުރުމަށް ހއ. އިހަވަންދޫ ކޯޓުން ފުލުހުން ނަގާފައިވާ ކޯޓް އަމުރުގައިވާ ގޮތުން ހާޝިމް ދިރިއުޅުއްވާ ގެ ބަލައި ފާސްކުރުނީ ސައްހަ ނޫން ލިޔެކިޔުންތަކެއް ގެންގުޅޭ ކަމަށް ތުހުމަތު ކުރެވިގެން އެވެ. އަދި ހާޝިމް ހައްޔަރު ކުރުމަށް އެ ކޯޓުން ދިން އަމުރުގައިވާ ގޮތުގައި ހާޝިމް ހައްޔަރު ކުރަނީ މިދިޔަ މާޗް މަހުގެ އެއްވަނަ ދުވަހު ދިއްދޫ ކައުންސިލުން އެލްޖީއޭއަށް ފޮނުވި ކިޔެކިޔުންތަކެއްގައި ސައްހަ ނޫން ލިޔުންތަކެއް ހުރި ކަމަށް ޝައްކު ކުރެވޭތީ އެކަން ކުރުމުގައި ހާޝިމް ބައިވެރިވެފައިވާ ކަމަށް ތުހުމަތު ކުރެވޭތީ އެވެ. އަދި ހާޝިމް ހައްޔަރުނުކޮށް ބަހައްޓައިފި ނަމަ އެ މައްސަލައިގެ ހެކި ފޮރުވައި އެކަމުގެ ސަބަބުން މުޖުތަމައަށް ނުރައްކާ ވެދާނެ ކަމަށް ވެސް ހައްޔަރު ކުރަން ނެގި ކޯޓް އަމުރުގައިވެ އެވެ.
ދިއްދޫގައި ސަރުކާރުން އަޅާފައިވާ ހައުސިން ޔުނިޓްތައް ދޭނެ ބައެއް ކަނޑައެޅުމުގެ މައްސަލައިގައި ހައުސިން މިނިސްޓްރީ އާއި އެ ކައުންސިލާ ދެމެދު ވަނީ މައްސަލަ ހޫނުވެފަ އެވެ. އެގޮތުން އެ އިމާރާތްތައް ލިބޭނެ ބަޔަކު ހައުސިން މިނިސްޓްރީ އިން ކަނޑައަޅާފައި ވަނިކޮށް ދިއްދޫ ކައުންސިލުން އަމިއްލައަށް ލިސްޓެއް އެކުލަވާލި ކަމަށް ބުނެ، އެލްޖީއޭއިން ވަނީ މީގެ ކުރިން ހާޝިމް ސަސްޕެންޑް ވެސް ކޮށްފަ އެވެ.
ދިއްދޫ ކައުންސިލްގައި މުޅިން ވެސް ތިއްބަވަނީ އެމްޑީޕީގެ ކައުންސިލަރުން އެވެ. ހާޝިމް އަކީ ހއ އަތޮޅުގައި އެމްޑީޕީގެ ހަރަކާތްތައް ރާވައި އިންތިޒާމް ކުރުމުގައި އިސްކޮށް އުޅޭ ފަރާތެކެވެ.