"ކްރިޝް" ސިލްސިލާގެ އިތުރު ފިލްމަކަށް ބެލުންތެރިން އިންތިޒާރުކުރަމުން ދަނިކޮށް ޑައިރެކްޓަރު ރާކޭޝް ރޯޝަން ވަނީ އެ ސިލްސިލާގެ ހަތަރު ވަނަ ފިލްމު، "ކްރިޝް 4" 2020 ވަނަ އަހަރުގެ ޑިސެމްބަރު މަހު ރިލީޒްކުރާނެ ކަމުގެ އުފާވެރި ހަބަރު ވަނީ މި އަހަރުގެ ކުރީކޮޅު އިއުލާންކޮށްފަ އެވެ.
ރިތިކް ރޯޝަން ސުޕަހީރޯއެއްގެ ރޯލުން ފެނިގެންދާ މި ފިލްމުގެ ޝޫޓިން ފަށާނެ ތާރީހަކާއި މި ފިލްމުގައި ރިތިކާ އެކު ފެނިގެންދާނެ ބަތަލާ އަކު އަދި ހާމައެއްނުކުރެ އެވެ.
މި ފިލްމުގެ އެންމެފަހުގެ ހަބަރުތައް ބުނާގޮތުން ރާކޭޝް އަންނަނީ "ކްރިޝް 4" އާ އެކު "ކްރިޝް 5" ވެސް ޝޫޓްކުރުމަށް ތައްޔާރުވަމުންނެވެ. ހަބަރުތައް ބުނާގޮތުން އަންނަ އަހަރުގެ ތެރޭގައި އެ ދެ ފިލްމުގެ ޝޫޓިން ފަށާނެ އެވެ. ދެ ފިލްމު އެއްފަހަރާ ޝޫޓްކުރުމާ ގުޅޭގޮތުން ރާކޭޝް އަދި އެއްވެސް ވާހަކައެއް ދައްކާފައެއްނުވެ އެވެ.
މި ސިލްސިލާގައި މިހާތަނަށް އުފައްދި ތިން ފިލްމަށް ވުރެން ހުރިހާ ގޮތަކުން ވެސް ހަތަރު ވަނަ ފިލްމު މޮޅު ވާނެ ކަމަށް ރާކޭޝް މީގެކުރިން ވަނީ ބުނެފަ އެވެ.
މި ސިލްސިލާގެ ތިން ވަނަ ފިލްމު ރިލީޒްވެފައިވަނީ 2013 ވަނަ އަހަރު އެވެ. އެ ފިލްމުގައި ރިތިކާ އެކު ބަތަލާގެ ރޯލުން ފެނިގެން ގޮސްފައިވަނީ އޭގެކުރީ ފިލްމުގައި ވެސް އޭނާ އާއެކު ފެނިގެންދިޔަ ބަތަލާ ޕްރިޔަންކާ ޗޯޕްރާ އެވެ. އަދި ނުބައިބައި ރޯލުތަކުން ފެނިގެން ގޮސްފައިވަނީ ވިވެކް އޮބްރޯއި އާއި ކަންގަނާ ރަނާވަތެވެ.
ރިތިކްގެ ފިލްމެއް ރިލީޒްނުވާތާ މިހާރު އަހަރަކަށް ވުރެން ގިނަ ދުވަސް ވަނީ ވެފަ އެވެ. އޭނާ މިހާރު އަންނަނީ އާރް ބަލްކީ ޑައިރެކްޓްކުރާ "ސުޕަ 30" ކިޔާ ފިލްމެއް ޝޫޓްކުރަމުންނެވެ.