އެއް ދުވަހުން ލައިސެންސް ނެގޭ "އެއްލަކިން" ޕްރޮގްރާމް ކުރިޔަށް ގެންދާ މުއްދަތު އިތުރު ކުރުމަށް ޓްރާންސްޕޯޓް އޮތޯރިޓީ އިން ނިންމައިފި އެވެ. ޓްރާންސްޕޯޓުން ކުރިން ނިންމާފައި ވަނީ މިރޭގެ ނިޔަލަށް އެ ޕްރޮގްރާމް ކުރިޔަށް ގެންދިޔުމަށެވެ.
ނަމަވެސް އެ އޮތޯރިޓީ އިން މިއަދު ނެރުނު ބަޔާނެއްގައި ބުނެފައި ވަނީ އެއްލަކިން ޕްރޮގްރާމް މި މަހުގެ ނިޔަލަށް ކުރިޔަށް ގެންދާނެ ކަމަށާއި ހިދުމަތް ހޯދަން ބޭނުންވާ ފަރާތްތަކަށް ޓޯކަން ނަމްބަރު ދޫކުރުން ކޮންމެ ދުވަހަކު ހަވީރު 4:00 އިން 5:00 އަަކަށް ސޯޝަލް ސެންޓަރުގައި ކުރިޔަށްދާނެ ކަމަށެވެ.
އެއްލަކިން ޕްރޮގްރާމުގެ ދަށުން މިހާތަނަށް ވެސް 700 އަށް ވުރެ ގިނަ މީހުން ވަނީ ލައިސެންސް ނަގާފަ އެވެ. އެ ޕްރޮގްރާމަށް ބޮޑު ތަރުހީބެއް ލިބިފައިވާ އިރު އެންމެ ފަހުން ނަމްބަރު ދޫކުރަން ހުޅުވާލުމުން ވެސް ދިގު ކިއޫއެއް ހަދާލި އެވެ.