މި އަހަރު ރޯދަ މަހުގެ ފުރަތަމަ 15 ދުވަހު ފުލުހުންގެ އިދާރާއަށް ހުށަހެޅުނު މައްސަލަތައް މިދިޔަ އަހަރާ އަޅާބަލާއިރު ދަށްވެފައިވާކަމަށް ތަފާސް ހިސާބުތަކުން ދައްކާ ކަމަށް ފުލުހުން ބުނެފި އެވެ.
ފުލުހުން ބުނީ މިދިޔަ އަހަރު ރޯދަ މަހުގެ ފުރަތަމަ 15 ދުވަހު ފުލުހުންނަށް 596 މައްސަލައެއް ހުށަހެޅިފައިވާ ކަމަށާއި މިއަހަރު ހުށަހެޅިފައިވަނީ 556 މައްސަލައެއް ކަމަށެވެ. ވަކިވަކި ފުލުހުންނަށް ހުށަހެޅި މައްސަލަތަކުގެ ތެރޭގައި ރޯދަމަހުގެ ދުވާލުގެ ވަގުތުގައި ކައިގެން މިދިޔަ އަހަރު 15 މައްސަލައެއްގައި 18 މީހަކު ހައްޔަރުކޮށްފައިވާއިރު މިއަހަރު ހަތް މައްސަލައެއްގައި ހަތް މީހަކު ހައްޔަރުކޮށްފައިވާ ކަމަށް ފުލުހުން ބުންޏެވެ.
ތަފާސް ހިސާބުތަކުގައިވާ ގޮތުން އެންމެ ގިނައިން ހުށަހެޅިފައިވަނީ ވައްކަމުގެ މައްސަލަތައް ކަމަށާއި އެގޮތުން ވައްކަމުގެ 127 މައްސަލަ މިއަހަރު ހުށަހެޅިފައިވާއިރު މިދިޔަ އަހަރުގެ 109 މައްސަލައެއް ހުށަހަޅާފައިވާ ކަމަށެވެ. ވައްކަމުގެ މައްސަލަތަކަށް ބަލާއިރު މައިގަނޑު ގޮތެއްގައި ހުށަހަޅާފައިވަނީ ކުދި ވައްކަމުގެ މައްސަލަތައް ކަމަށް ފުލުހުން ބުންޏެވެ.
"ކޮންމެ އަހަރެއްގެ ރޯދަ މަހެއްގައި ކުދި ވައްކަންތައް އިތުރުވަމުންދާއިރު އެފަދަ މައްސަލަތައް މަދުކުރުމުގައި ފުލުހުން ކުރަމުންދާ މަސައްކަތްތަކުގެ އިތުރުންވެސް އާންމު ރައްޔިތުންވެސް މިފަދަ ކަންކަމަށް ހާއްސަ ސަމާލުކަމެއް ދެއްވުމަކީ މިފަދަ މައްސަލަތައް މަދުކުރުމަށްޓަކައި އެޅިދާނެ މުހިންމު ފިޔަވަޅެއް،" ފުލުހުން ބުންޏެވެ.
ފުލުހުން ބުނީ، ދިރިއުޅޭ ގެ ނުވަތަ އެޕާޓްމަންޓްގެ ހުރިހާ ދޮރެއް ރަނގަޅަށް ތަޅުލައި ނިދުމުގެ ކުރިންނާއި އަދި ގެއިން ބޭރަށް ދިއުމުގެ ކުރިން އިތުރަށް ޗެކްކުރުން މުހިންމު ކަމަށާއި ގޭގައި ހުންނަ އަގޮބޮޑު އަދި ފަސޭހައިން އުފުލައި ގެންގުޅެވޭ ޒާތުގެ ތަކެތި ބޮޑަށް ރައްކާކޮށް، ގޭގައި ފައިސާ ރައްކާކުރުމުގެ ބަދަލުގައި ބޭންކަށް ފައިސާ ޖަމާކުރުމަކީ ރައްކާތެރިކަމުގެ އެޅިދާނެ ފިޔަވަޅެއް ކަމަށެވެ. އަދި ފޯނާއި ޓެބްލެޓް ލެޕްޓޮޕާއި ޕާސްޕޯޓާއި އައިޑީ ކާޑު އަދި ކޭޝްކާޑު ފަދަ މުހިއްމު ތަކެތި ހާމަތަންތަނުގައި ނުބަހައްޓައި ރައްކާކުރުމަކީވެސް ވައްކަމުގެ މައްސަލަތަކުން ރައްކާތެރިވުމަށް އެޅިދާނެ މުހިންމު ފިޔަވަޅެއް ކަމަށް ފުލުހުން ބުންޏެވެ.
ފުލުހުން އިތުރަށް ބުނީ، ވައްކަމުގެ މައްސަލަތައް މަދުކުރުމަށް ފުލުހުން ހަރަކާތްތެރިވި ނަމަވެސް ވައްކަމުގެ މައްސަލަތަކަކީ ވަރަށް ރޭވިގެން ކުރަމުންދާ ކަމަކަށްވުމުން އެކަމުގައި ރައްޔިތުންގެ ފުރިހަމަ އެހީތެރިކަން ލިބުމަކީ ވަރަށް މުހިއްމު ކަމެއް ކަމަށެވެ. އަދި އެފަދަ ކޮންމެ މަސައްކަތެއްގައިވެސް ފުލުހުންނަށް ރައްޔިތުންގެ ފަރާތުން ފުރިހަމަ އެއްބާރުލުން ދެއްވާ ކަމަށާއި އެފަދަ މައްސަލަތަކަކީ ރައްޔިތުން މިހާރަށްވުރެ ބޮޑަށް ސަމާލުކަންދީފިނަމަ ހުއްޓުވިދާނެ މައްސަލަތަކެއް ކަމަށްވެސް ފުލުހުން ބުންޏެވެ.