މޮރިޝަސްގައި ޑަބަލްސްގެ ދެ ޕެއާ ފައިނަލަށް

މޮރިޝަަސްގައި މިހާރު ކުރިއަށްދާ މޮރިޝަސް އިންޓަނޭޝަނަލް ބެޑްމިންޓަން މުބާރާތުގެ ފައިނަލަށް ރާއްޖޭގެ ޑަބަލްސް ދެ ޕެއާ ދަތުރު ކޮށްފި އެވެ.

ފައިނަލަށް ދިޔަ، ޑަބަލްސް ދެ ޕެއާއަކީ އަންހެން ޑަބަލްސްގެ ފައިނަލަށް ދަތުރު ކުރި އާމިނަތު ނަބީހާ އަބްދުރައްޒާގާއި ފާތުމަތު ނަބާހާ އަބްދުރައްޒާގެވެ. އެއްމާބަނޑު ދެބެންގެ އެ ޕެއާ އަންހެން ޑަބަލްސް ކެޓަގަރީ ފެށީ ވެސް ސެމީ ފައިނަލުންނެވެ.

ސެމީ ފައިނަލު މެޗުގައި މޮރިޝަސްގެ ދެ ކުޅުންތެރިން ކަމަށްވާ ޖެމީމާ އާއި ގަނޭޝް މުންގަރާއާ ދެކޮޅަށް ކުޅެ ނަބީހާ އާއި ނަބާހާގެ ޕެއާ މެޗު ކާމިޔާބު ކުރީ ދެ ގޭމް އެއް ގޭމުންނެވެ. ފުރަތަމަ ގޭމް ކާމިޔާބު ކުރީ 21-18 އިންނެވެ. ދެ ވަނަ ގޭމުން ބަލިވީ 21-14 އިންނެވެ. ތިން ވަނަ ގޭމް ކާމިޔާބު ކުރީ 21-8 ންނެވެ.

ދެން ފައިނަލަށް ދަތުރު ކުރީ މިކްސް ޑަބަލްސްގައި އާމިނަތު ޝަހްރުނާޒް މޫސާ އާއި ސާރިމް މުހައްމަދުގެ ޕެއާ އެވެ. ސެމީ ފައިނަލުގައި އެ ދެ ކުޅުންތެރިންނާ ވާދަ ކުރީ މޮރިޝަސްގެ ދެ ކުޅުންތެރިން ކަމަށްވާ ކާބިރު އާއި ގަނޭޝް އެވެ. ޝަހްރުނާޒް އާއި ސާރިމްގެ ޕެއާ ފައިނަލަށް ދަތުރު ކުރީ ސީދާ ދެ ގޭމުން މެޗު ކާމިޔާބު ކޮށްގެންނެވެ. އެ ދެ ކުޅުންތެރިން މެޗު ކާމިޔާބު ކުރި 21-14 އަދި 21-16 އިންނެވެ.

މިކްސް ޑަބަލްގައި ހިމެނޭ އަނެއް ދެ ޕެއާ، ކަމަށްވާ ނަބީހާ ތޯއިފްގެ ޕެއާ ވަނީ މޮރިޝަސްގެ ޕެއަ އަތުން ބަލިވެ އެ ކެޓަގަރީން ކަޓާފަ އެވެ.

އިއްޔެ ކުޅުނު ސިންގަލްސް އިވެންޓްގެ ކްއާޓާ ފައިނަލުގައި ޝަހްރުނާޒް ވަނީ މޮރިޝަސްގެ އަރީލިއޭ އަތުން ދެ ގޭމުން ބަލިވެފަ އެވެ. އަރީލިއޭ މެޗު ކާމިޔާބު ކުރީ 21-12 އަދި 21-13 އިންނެވެ.

މުހައްމަދު އަޖުފާން އާއި ތޯއިފް އަހްމަދުގެ ޕެއާ ވަނީ ސެމީ ފައިނަލުގައި މެޭލޭޝިއާގެ ދެ ކުޅުންތެރިން ކަމަށްވާ ޔުންގް ޗައި އާއި ކައިވުންޓީ އަތުން ބަލިވެފަ އެވެ. މެލޭޝިއާގެ ދެ ކުޅުންތެރިން މެޗު ކާމިޔާބު ކުރީ ސީދާ ދެ ގޭމުންނެވެ. ސެމީން ބަލިވި ނަމަވެސް އަޖުފާން އާއި ތޯއިފް ވަނީ ފިރިހެން ޑަބަލްސްގެ ބްރޯންޒް މެޑަލް ހޯދާފަ އެވެ.