ފައިނަލުގައި އޮސްޓްރިއާގެ ޑޮމިނިކް ތީމްގެ މައްޗަށް ކާމިޔާބު ހޯދައި ސްޕެއިންގެ ރަފޭލް ނަޑާލް ފްރެންޗް އޯޕަން ޓެނިސް މުބާރާތުގެ ޗެމްޕިއަންކަން ހޯދައިފި އެވެ.
ހަތް ވަނަ އަށް ސީޑް ކޮށްފައިވާ، ތީމްގެ މައްޗަށް ދުނިޔޭގެ އެއް ވަނަ ކުޅުންތެރިޔާ ނަޑާލް މެޗު ކާމިޔާބު ކުރީ، 6-4، 6-3 އަދި 6-2 އިންނެވެ. މިއީ ފްެންޗް އޯޕަން ޓެނިސް މުބާރާތް ނަޑާލް ކާމިޔާބު ކުރި 11 ވަނަ ފަހަރެވެ. އަދި އޭނާ ކާމިޔާބު ކުރި ގްރޭންޑް ސްލޭމް 17 ވަނަ މުބާރާތެވެ. ގްރޭންޑް ސްލޭމްގެ ފިރިހެންުންގެ އެންމެ ގިނަ މުބާރާތް ކާމިޔާބު ކޮށްފައި ވަނީ ސްވިޒަލޭންޑްގެ ރޮޖާ ފެޑްރާ އެވެ. އޭނާ ވަނީ ގްރޭންޑް ސްލޭމްގެ 20 މުބާރާތް ކާމިޔާބު ކޮށްފަ އެވެ.
"ފްރެންޗު އޯޕަން 11 ވަނަ ފަހަރަށް ކާމިޔާބު ކުރުމަކީ ހުވަފެނެއް،" ކާމިޔާބަށް ފަހު ނަޑާލް ބުންޏެވެ.
މެޗުގެ ތިން ވަނަ ސެޓްގައި ނަޑާލްގެ އަތައް ލިބުނު ކުޑަ އަނިޔާއެއްގައި އޭނަ ވަނީ ފުރުވާ ހޯދާފަ އެވެ. އޭނާ ބުނީ އަނިޔާ އަށްފަހު ސެޓް ގެއްލިދާނެހެން އޭނާ އަށް ހީވި ކަމަށެވެ.
"އަހަރެން ކުޅުނު ގޮތަށް ކުޅުމަކީ ވަރަށް މުހިންމު ކަމެއް، އެއީ ވަރަށް އުނދަގޫ ވަގުތެއް އަހަރެންގެ އަތައް އަނިޔާވި ވަގުތު، އޭނާ [ތީމް] އަކީ އެންމެ ފަހު ފުރުސަތުވެސް ބޭނުން ކުރަން އެނގޭ ކުޅުންތެރިޔެއް."
އޭނަ ބުނީ ގްރޭންޑް ސްލޭމްގައި ފެޑްރާއަށް ވުރެ ފަހަތުގައި އޮތުމަކީ އޭނާ މާޔޫސްވާ ކަމެއް ނޫން ކަމަށެވެ.
ރަފޭލް ނަޑާލް