ކުރިއަށް އޮތް ރިޔާސީ އިންތިހާބުގައި ވޯޓުލެވޭ މީހުން ހިމަނައި އިލެކްޝަން ކޮމިޝަނުން އާންމުކޮށްފައިވާ ވޯޓާސް ލިސްޓަށް މިހާތަނަށް 21 ޝަކުވާ ހުށަހަޅާފައިވާ ކަމަށް އިލެކްޝަން ކޮމިޝަނުން ބުނެފި އެވެ.
ވޯޓާސް ލިސްޓު އާންމުކޮށް ލިސްޓަށް ޝަކުވާ ހުށަހަޅަން އީސީން ހުޅުވާލީ މިމަހުގެ ނުވަ ވަނަ ދުވަހު އެވެ.
އީސީގެ މެންބަރު އަދި ތަރުޖަމާން އަހްމަދު އަކްރަމް މިއަދު "އަވަސް" އަށް ވިދާޅުވީ، މިއަދާ ހަމައަށް 21 ޝަކުވާ ވޯޓާސް ލިސްޓަށް ލިބިފައިވާ ކަމަށެވެ. އެންމެ ގިނައިން ހުށަހަޅާފައިވަނީ ލިސްޓުގައި 18 އަހަރުން ދަށުގެ ކުދިންގެ ނަންތައް ހުރުމާއި މަރުވެފައިވާ މީހުންގެ ނަންތައް ހުރުމުން ކަމަށް ވެސް އަކްރަމް ވިދާޅުވި އެވެ.
"ޝަކުވާ ހުށަހަޅާ ވަރު މަދު އަދިވެސް. މިއަދުވެސް ނުލިބޭ އެންމެ ޝަކުވާއެއް ވެސް އަދި. ގިނައިން ޝަކުވާ ހުށަހަޅާފައިވަނީ ދެކަމަކަށް. އެއީ 18 ނުފުރޭ ކުދިންނާ މަރުވެފައިވާ މީހުން ލިސްޓުގައި ހިމެނިފައިވާތީ،" އަކްރަމް ވިދާޅުވި އެވެ.
އީސީން މިހާރު އެކުލަވާލާފައިވާ ވޯޓާސް ލިސްޓްގައި ވޯޓު ލިމުގެ ހައްގު ލިބިފައިވާ މީހުންގެ ގޮތު ހިމަނާފައިވަނީ 263183 މީހުންނެވެ. ނަމަވެސް މި ނަން ތަކުގެ ތެރޭގައި މަރުވެފައިވާ މީހުންގެ ނަންތައް ވެސް ހިމެނިފައިވުން އެކަށީގެންވާ ކަމަށް އީސީން ވަނީ ބުނެފަ އެވެ. އެއީ އެ ލިސްޓަކީ ޑީއެންއާރުގެ ލިސްޓަށް ވާތީ އެވެ.
އިލެކްޝަން ކޮމިޝަނުން އާންމުކޮށްފައިވާ ވޯޓާސް ލިސްޓް ވަނީ ގެޒެޓްގައި އާންމުކޮށްފަ އެވެ. އެ ލިސްޓަށް ޝަކުވާ ހުށަހެޅުމުގެ ސުންގަޑި ހަމަވާނީ މިމަހުގެ 20 ވަނަ ދުވަހުގެ ނިޔަލަށެވެ. ޝަކުވާ ހުށަހަޅަންޖެހޭނީ އީސީން ދޫކުރާ ޝަކުވާ ފޯމަކުންނެވެ. މި ފޯމް އީސީގެ ވެބްސައިޓުން ވެސް ލިބޭނެ އެވެ. އަދި ރަށެއްގައި ނަމަ ރަށު ކައުންސިލްތަކުން ވެސް ފޯމްތަށް ދޫކުރުމާއި ބަލައިގަތުމުގެ ހިދުމަތް ދޭނެ އެވެ. މާލޭގައި ނަމަ ފޯމްތައް ބަލައިގަންނާނީ އީސީގެ އިންތިހާބީ މަރުކަޒް ހުންނަ ކުރީގެ ބާ ޖަމާލުއްދީން އިމާރާތަށެވެ.
ވޯޓާސް ލިސްޓްގައި ނަން ހިމެނޭތޯ ބެލުމަށް އެސްއެމްއެސް ކުރަން ޖެހެނީ، "ވީއާރު (ސްޕޭސް) އައިޑީކާޑް ނަމްބަރު ޖެހުމަށް ފަހު 1414 އަށެވެ.