ލުއިސް ސުއަރޭޒް އުރުގުއޭގެ ގައުމީ ޓީމަށް ކުޅުނު 100 ވަނަ މެޗުގައި ސައުދީ އަރަބިއްޔާގެ މައްޗަށް 1-0 ގެ ނަތީޖާއަކުން ކާމިޔާބު ހޯދައި، އުރުގުއޭ ދެ ވަނަ ބުރަށް ދަތުރު ކޮށްފި އެވެ.
އުރުގުއޭ މޮޅުވުމުން، ގުރޫޕް "އޭ" އިން ދެ ވަނަ ބުރުގެ ޖާގަ ކަށަވަރު ވެފައި ވަނީ އުރުގުއޭގެ އިތުރުން މުބާރާތް ބާއްވާ ގައުމު ރަޝިއާއަށެވެ. ސައުދީ އާއެކު އެ ގުރޫޕްގައި ހިމެނުނު މިސްރު ވަނީ މުބާރާތުން ކަޓާފަ އެވެ.
މުބާރާތުގެ ފުރަތަމަ މެޗުގައި، ރަޝިއާ އަތުން 5-0 ތަފާތު ބޮޑުކޮށް ބަލިވި ސައުދީން ވަނީ، އުރުގުއޭ އާ ދެކޮޅަށް ރަނގަޅު ކުޅުމެއް ދައްކާފަ އެވެ. ޓީމުގެ މެދުތެރެއިން ބޯޅަ ކޮންޓްރޯލް ކޮށްގެން ޕާސްތަކެއް އުފައްދަމުން ދިޔައިރު ފުރަތަމަ ހާފުގައި ސައުދީން ވަނީ އުރުގުއޭގެ ގޯލަށް ނުރައްކާތެރި ދެ ބޯޅައެއްވެސް ފޮނުވާލަފަ އެވެ.
ފުރުތަމަ މެޗުގައި، މިސްރާ ދެ ކޮޅަށް ލުއިސް ސުއަރޭޒް ދެއްކި ދަށް ކުޅުމާއެކު ސަޕޯޓަރުންގެ ފާޑު ކިޔުން އަމާޒު ވެފައި ވަނިކޮށް 100 ވަނަ މެޗަށް ނިކުތް ސުއަރޭޒް އުރުގުއޭގެ ލަނޑު ކާމިޔާބު ކުރީ މެޗުގެ 23 ވަނަ މިނެޓްގަ އެވެ.
ކާލޯސް އެންޑްރެސް ސަންޗޭޒް ނެގި ކޯނަރުން ތަނަވަސްވި ބޯޅަ ސުއަރޭޒް ބޮލުން ގޯލް ތެރެއަށް ފޮނުވާލިއިރު ގޯލް އޮތީ ހުސްކޮށެވެ. އެ ގޯލް ސައުދީ ކޮޅަށް ވަނުމުގައި އެންމެ ބޮޑު ގޯހެއް ހެދީ ޓީމުގެ ކީޕަރު މުހައްމަދު އަލް އޯއިސް އެވެ. އުރުގުއޭ ނެގި ކޯނަރަށް އޭނާ ކުރިއަށް ނިކުތީ ޕެނަލްޓީ އޭރިއާ ތެރޭގައި ސައުދީގެ ކުޅުންތެރިންވެސް ތިއްބަ އެވެ.
ކުރިގެ މަޗަށް ވުރެ ކުޅުން ރަނގަޅު ކުރި ނަމަވެސް، ފުރަތަމަ ހާފުގައި ސައުދީން ހިފެހެއްޓި ޓެމްޕޯ ދެ ވަނަ ހާފުގައި ނުހިފެހެއްޓުނެވެ.