ހަތް ކޮއިލުގެ ރަސްކަމުގެ ދަހިވެތި ކަމުގައި ބަޔަކު ކުރަމުންދާ ހަނގުރާމަ ދައްކުވައިދޭ އެޗްބީއޯގެ ފިލްމު ސީރީޒް "ގޭމް އޮފް ތުރޯންސް" އަށް ކުރެވޭ އިންތިޒާރު ދުވަހެއް ދުވަހަކަށް މި އަންނަނީ އިތުރު ވަމުންނެވެ. ދެން އޮތީ މި ސީރީޒްގެ އެންމެފަހު ސީޒަން އެވެ. ސީރީޒް ނިމޭއިރު ހަތްކޮއިލުގެ މައްޗަށް ރަސް ކުރާނީ ކާކުތޯ ބަލާލުމަށް އެންމެން މި ތިބީ ކެތްމަދުވެފަ އެވެ.
މި ސީރީޒްގައި މުހިންމު ރޯލަކުން ފެނިގެންދާ ބަތަލާ ސޯފީ ޓާނާ ނުވަތަ ސީރީޒްގައި މަޝްހޫރު ނަމުންނަމަ ސަންސާ ސްޓާކް ބުނީ ސީރީޒް ފިނާލޭގައި "ގިނަ މަރުތަކާއި ނަފްސާނީ އެތައް އަނިޔާތަކެއް" ފެނިގެންދާނެ ކަމަށެވެ. ސޯފީ މިހެން ބުނީ އެންޓަޓެއިންމަޓް ޕޯޓަލް ގޯލްޑް ޑެބީއަށް ދިން އިންޓަވިއުއެއްގަ އެވެ.
ކުރީގެ ހުރިހާ ސީޒަނަކަށްވުރެ މި ސީޒަނުގައި ފެނިގެންދާ މަންޒަރުތައް އަސަރުގަދަވެފައި އަނިޔާވެރިވާނެ ކަމަށް ސޯފީ ބުންޏެވެ. ފަހު ސީޒަންއާއި ބެހޭގޮތުން ބެލުންތެރިންނަށް ހިންޓެއް ދޭން ބޭނުންނަމަ ބުނާނީ ކީކޭތޯ އެހުމުން ސޯފީ ބުނީ ފަހުގެ ހަނގުރާމައަށް ތައްޔާރުވުމަށް ގިނަ ބަޔަކު އެއްބައިވާނެ ކަމަށެވެ.
"ހަނގުރާމައާއި މެދު އެކި މީހުންގެ މެދުގައި ވަރަށް ގިނަ މައްސަލަތައް ފެންމަތިވާނެ. މީގެ ކުރީގެ ސީޒަންތަކަށްވުރެ މައްސަލަތައް ގިނަވެފައި، އަނިޔާވެރިކަން އިންތިހާއަށް ގޮސް، މަރުވާ މީހުންގެ އަދަދު ގިނަވެ އަދި ނަފްސާނީގޮތުން މީހުން ބަލިކަށިވާނެ އެތަށް ކަމެއް ހިނގާނެ."
ފަހު ސީޒަން ބެލުންތެރިންނާ ހަމައަށް ގެނެސްދޭނީ އަންނަ އަހަރުކަމަށް އެޗްބީއޯއިން ވަނީ ބުނެފަ އެވެ.