ރައްޔިތުން މަޖިލީހުގެ ހުސްވެފައިވާ އަމީންއާންމުގެ މަގާމަށް ކުރިމަތިލާފައިވާ ފާތިމަތު ނިއުޝާ އެ މަގާމަށް އައްޔަން ކުރުމަށް ރައްޔިތުންގެ މަޖިލީހުން މިއަދު ފާސްކޮށްފި އެވެ.
އެ މަގާމަށް ނިއުޝާ އައްޔަން ކުރަން ވޯޓު ދެއްވީ މިއަދު މަޖިލީހަށް ވަޑައިގެންނެވި 33 މެންބަރުންގެ ވޯޓުންނެވެ.
ނިއުޝާ އަކީ މިހާރު މަޖިލީހުގެ އަމީންއާންމުގެ ނައިބްގެ މަގާމް ފުރުއްވަމުންގެންދަވާ ފަރާތެވެ.އެމަގާމަށް ހަމައެކަނި ކުރިމަތިލައްވާފައިވަނީވެސް ނިއުޝާ އެވެ. އެމަގާމަށް ކުރިމަތި ލުމަށް ހުޅުވާލި މިދިޔަ ޖޫން މަހުގެ 12 ވަނަ ދުވަހު އެވެ.
މީންއާންމަކު ހޯދަން މަޖިލީހުން އިއުލާން ކުރީ، ސުޕްރީމް ކޯޓުން 1 ފެބްރުއަރީގައި ނެރުނު އަމުރާ ގުޅިގެން މަޖިލީހުގެ އަމީންއާންމުގެ މަގާމުގައި މިހާތަނަށް ހުންނެވި އަހުމަދު މުހައްމަދު އެ މަހު ހަތަރު ވަނަ ދުވަހު އިސްތިއުފާ ދެއްވުމާ ގުޅިގެނެވެ. އޭގެ ފަހުން އެ މަގާމް އަދާ ކުރަމުން އައީ ނިއުޝާ އެވެ.
ނިއުޝާއަކީ 2012 ވަނަ އަހަރުން ފެށިގެން މަޖިލީހުގެ އަމީން އާންމު ކަމުގެ ނައިބުގެ މަގާމު އަދާކުރައްވަމުން ގެންދަވާ ފަރާތެވެ. އޭނާ ވަނީ މަޖިލީހުގެ ލީގަލް ކައުންސިލްގެ މަގާމު ހަތަރު އަހަރު ދުވަސް ވަންދެންވެސް އަދާކުރައްވާފަ އެވެ.