އިލެކްޝަންސް ކޮމިޝަން (އީސީ)ގެ ނައިބު ރައީސް އަލީ ނަޝާތު އާއި މެންބަރު މުހައްމަދު އާސިފް މަގާމުން ވަކިކުރަން ފާސްވިއިރު މެންބަރު ޑރ. މުހައްމަދު ޒާހިރު ވަކިކުރަން ފާހެއްނުވި އެވެ.
ނަޝާތާއި އާސިފް އަދި ޒާހިރު ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން އިއްޔެ ފާސްކުރި އެވެ.
މަޖިލީހުގެ މިއަދުގެ ޖަލްސާގައި ނެގި ވޯޓުގައި ނަޝާތު އާއި އާސިފް މަގާމުން ވަކިކުރަން ފެންނަ ކަމަށް 69 މެންބަރުން ވޯޓު ދެއްވިއިރު ނުފެންނަ ކަމަށް ވޯޓު ދެއްވީ 10 މެންބަރުންނެވެ. ޒާހިރު ވަކިކުރުމާއި ގުޅޭ ގޮތުން ނެގި ވޯޓުގައި އޭނާ މަގާމުން ވަކިކުރަން ނުފެންނަ ކަމަށް 70 މެންބަރުން ވޯޓު ދެއްވި އެވެ.
އީސީގެ މެންބަރުކަމުން ވަކިކުރުމުގެ މައްސަލައިގައި ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓުގައި އެ މެންބަރުންނަށް ބޮޑެތި ތުހުމަތުތަކެއް ކޮށްފައިވެ އެވެ.
ކޮމިޓީ ރިޕޯޓުގައި ތުހުމަތުކޮށްފައިވާ ގޮތުން އީސީގެ ޑޭޓާބޭސް އިން މައުލޫމާތު ނަގައިގެން ނަޝާތު އެޕްލިކޭޝަންތައް ހަދައި ވިއްކާފައިވެ އެވެ. އެ އެޕްލިކޭޝަންގެ އެކްސެސް ސިޔާސީ ބައެއް ޕާޓީތަކަށް ދީފައިވާ ކަމަށްވެސް ވަނީ ތުހުމަތުކޮށްފަ އެވެ.
އެ ރިޕޯޓުގައިވާ ގޮތުން ކޮމިޝަނަށް ކޮމްޕިއުޓަރު ސިސްޓަމްތަކެއް ހޯދާފައިވަނީ ވަކި ވިޔަފާރި ކުންފުންޏެއް މެދުވެރިކޮށެވެ. ސިންގަލް ސޯސް ޕްރޮކިއުމެންޓް އުސޫލުން އެ މެންބަރުންނާ ގުޅުން އޮންނަ ވިޔަފާރިކުރާ ފަރާތެއްގެ ކުންފުނިން އީސީއަށް ބައެއް އެއްޗެހި ހޯދާފައިވާ ކަމަށް ރިޕޯޓްގައިވެ އެވެ.