ލަންޑަން (ޖުލައި 13) - އިނގިރޭސި ރާނީގެ ހަތަރު އަހަރުގެ މާމަ ދަރިފުޅު ޕްރިންސް ޖޯޖަށް ހަމާލާދޭން ހިތް ވަރު ދިން މީހަކު އުމުރަށް ޖަލަށްލާން ހުކުމްކޮށްފި އެވެ.
ޕްރިންސް ވިލިއަމް އަދި ކެތަރީންގެ އެންމެ ދޮށީ ދަރިފުޅު ޖޯޖަކީ، އިނގިރޭސި ވިލާތުގެ ރަސްކަމާއި ހަވާލުވާން އޭނާގެ ބައްޕާފުޅަށްފަހު ތިން ވަނަ އަށް ހުންނެވި ބޭފުޅާ އެވެ.
އިނގިރޭސި ވިލާތުގެ ރައްޔިތެއް ކަމުގައިވާ ހުސްނެއިން ރަޝީދު، 32 ވަނީ ދީނީ ހަރުކާށި ޖަމާއަތްތަކުން ޖޯޖަށް ހަމާލާދޭން ރަނގަޅު ވާނެ ކަމަށްބުނެ ޓެލެގްރާމުގައި ޕޯސްޓެއް ކޮށްފަ އެވެ.
އެ ޕޯސްޓުގައި ޖޯޖުގެ ސްކޫލް އެޑްރެސް ހިމަނާފައިވާ އިރު "ޝާހީ އާއިލާ ވެސް ސަލާމަތެއް ނުވާނެ" ކަމަށް ލިޔެފަ އެވެ. ރަޝީދު އެންމެ ފުރަތަމަ ދައުވާއަށް އިންކާރު ކުރި ނަމަވެސް، ފަހުން އޭނާ ވަނީ ޓެރަރިޒަމްގެ ހަތަރު ދައުވާއަށް އިއުތިރާފުވެފަ އެވެ.
ކުރީގެ ވެބްސައިޓް ޑިވަލޮޕަރެއްގެ ގޮތުގައި މަސައްކަތް ކުރި ރަޝީދުގެ މައްޗަށް ކުށް ސާބިތުވެ، އޭނާ ވަނީ 25 އަހަރަށް ޖަލަށް ލާން ހުކުމްކޮށްފަ އެވެ.