ޕާކިން ސްޓިކާ ޖަހައިގެން ކޮށްފައިވާ ޖޫރިމަނާތައް މާފުކޮށްދޭން ރައީސް އަބުދުﷲ ޔާމީން އަބުދުލްގައްޔޫމް ނިންމެވި ނިންމުމަކީ ދިވެހި ޒުވާނުންނަށްޓަކައި ރައީސް ދެއްވެވި ދީލަތި މައާފެއް ކަމަށް ރައީސް އޮފީހުގެ ތަރުޖަމާނު އިބްރާހިމް މުއާޒް އަލީ ވިދާޅުވެއްޖެ އެވެ.
މުއާޒް މިއަދު ކުރެއްވި ޓްވީޓެއްގައި ވަނީ، 7.8 މިލިއަން ރުފިޔާގެ ޕާކިން ޖޫރިމަނާ މާފްކޮށްދެއްވުމަށް ރައީސް ނިންމެވީ އެފައިސާ ދައްކަން ޖެހިފައިވާ ގިނަ އަދަދެއްގެ ޒުވާނުން ތިބުމުން ކަމަށެވެ. އަދި އެއީ ރައީސް ޔާމީން ޒުވާނުންނަށްޓަކައި ދެއްވެވި ދީލަތި މާފެއް ކަމަށް މުއާޒް ވިދާޅުވި އެވެ.
ޕާކިން ސްޓިކާ ޖަހައިގެން ކޮށްފައިވާ ޖޫރިމަނާތައް މާފުކޮށްދޭން މިއަދު ނިންމާފައިވާއިރު، މާފުކޮށްދޭން ނިންމާފައިވަނީ 2015 ވަނަ އަހަރާއި 2016 ވަނަ އަހަރު ކޮށްފައިވާ ޖޫރިމަނާތަކެވެ.
އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު އަބުދުﷲ ޝިޔާޒް ވިދާޅުވީ، 2015 ވަނަ އަހަރާއި 2016 ވަނަ އަހަރުގެ ޕާކިން ޖޫރިމަނާގެ ގޮތުގައި ގާތްގަނޑަކަށް ހަތް މިލިއަން ރުފިޔާ ހިމެނޭ ކަމަށެވެ.
ޝިޔާޒް ވިދާޅުވީ، މިކަމަކީ ސިލްސިލާ ގޮތެއްގައު ކުރިއަށް ގެންދިއުމަށް ހަމަޖެހިފައިވާ ކަމެއް ނޫން ކަމަށާއި 2017 އަދި 2018 ވަނަ އަހަރުގެ ޕާކިން ޓިކެޓް މާފް ކުރުމާއި ގުޅޭގޮތުން ވަކި އެއްޗެއް ދެންނެވެން ނެތް ކަމަށެވެ.
ޕާކިން ޖޫރިމަނާ މާފް ކުރުމަށް ނިންމާފައިވާއިރު، 2015 ވަނަ އަހަރު ވަނީ ލައިސެންސް ނެތިގެން ސައިކަލް ދުއްވުމުން ކޮށްފައިވާ ޖޫރިމަނާތައް އެކީ މާފު ކޮށްދީފަ އެވެ.