ސްލައިމް ބޭނުން ކޮށްގެން އުފައްދާފައި ހުންނަ ކުޅޭ ސާމާނު ބޭނުންކުރާ ކުޑަކުދިން މިހާރު ރާއްޖޭގައި ވެސް ގިނަ އެވެ. ދާދިފަހުން އިނގެރޭސިވިލާތުގައި އެކި ކަހަލަ އުފެއްދުންތައް ރިވިއުކުރާ ވެސްބައިޓް "ވިޗް" އިން އާންމުކުރި ރިޕޯޓަކުން ހާމަވިގޮތުގައި ސްލައިމް ބޭނުން ކޮށްގެން އުފައްދާފައި ހުންނަ ކުޅޭ އެއްޗެއްސަކީ ކުޑަކުދިންނަށް ވަރަށް ނުރައްކާތެރި އެއްޗެކެވެ.
ސްލައިމްގައި ހިމެނޭ ވިހަ މާއްދާއެއް ކަމަށްވާ ބޯރޯންގެ ސަބަބުން ކުޑަކުދިންނަށް ޑައިރި އާއި ގައި ހިރުވުމާއި ހޮޑުލެވުމާއި އަދި ގައިގެ އެކި ތަންތަން އަކުނިވަޔަށް ދެމުން ކަހަލަ ކަންކަން ވަމުންދާ ކަމަށް އެ ރިޕޯޓުގައި ބުނެފައިވެ އެވެ. އެ ރިޕޯޓުގައި ބުނެފައިވާ ގޮތުން މި ތަކެތި އުފައްދާފައި ވަނީ ބޯރޯން ބޭނުންކުރަންޖެހޭ މިންވަރުކަމަށް އީޔޫއިން ކަނޑައަޅާފައި މިންގަނޑާއިވެސް ހިލާފަށެވެ.
ކުޑަކުދިންގެ އިތުރުން މާބަނޑު އަންހެނުނަށްވެސް މީގެން ނޭދެވޭ އަސަރުތައް ކުރާ ކަމަށްވެ އެވެ. ބައިގެންދިއުމާއި އުފަންވާއިރު ކުދިންގެ ގުނަވަންތައް ފުރިހަމައަށް ނުއުފެދި އުފަންވާ މައްސަލަތައް ކުރިމަތިވާ ކަމަށް ބުނެފައިވެ އެވެ. އަދި ކުދިން ވިހާ އަދަދު މަދުވަމަށްވެސް މީގެ ސަބަބުން މެދުވެރިވާކަމަށްވެ އެވެ.
ކްލޭ ގޮތަށް މަޑު ތަތްކަމެއް ހުންނަ ސްލައިމްއަކީ ސޯޑިއަމް ބޯރޭޓް އާއި ފެން އެއްކޮށްގެން ތައްޔާރުކޮށްފައި ހުންނަ އެއްޗެކެވެ. އެކި ކުލަ ކުލައިން ލިބެން ހުންނަ ސްލައިމް އަކީ މިހާރު ކުޑަކުދިންގެ ކުޅޭ ސާމާނު ތައްޔާރުކުރުމަށް ވަރަށް ގިނައިން ބޭނުންކުރަމުންދާ އެއްޗެކެވެ.
ސްލައިމްއަކީ ކުޑަކުދިންގެ ކުޅޭ އެއްޗެހި އުފައްދާ މަޝްހޫރު ކުންފުންޏެއް ކަމަށްވާ މެޓެލް އިން އުފެއްދި އެއްޗެކެވެ. މި އެންމެ ބޮޑަށް މަޝްހޫރުވެގެން އައީ 1976 ވަނަ އަހަރުގެ ފަހުންނެވެ. އެންމެ ފުރަތަމަ މި އުފައްދާ އުޅުނީ ގުއާ ބީންސް އިން ތައްޔާރުކުރާ ޕައުޑަރެއް ކަމަށްވާ ގުއާ ގަމް ބޭނުންކޮށްގެންނެވެ.