އެކެއް ފެބުރުއަރީގައި ސުޕްރީމް ކޯޓުން ނެރުނު އަމުރާ ގުޅިގެން ހައްޔަރުކުރި، އޭރުގެ ޖުޑީޝިއަލް އެޑްމިނިސްޓްރޭޓަރު ހަސަން ސައީދު ހަތަރު މަހާއި 24 ދުވަހަށް ޖަލަށްލާން ހުކުމްކޮށްފި އެވެ. އޭނާ ޖަލަށްލާން ކްރިމިނަލް ކޯޓުން މިއަދު ހުކުމް ކުރީ، ގާނޫނު ހިންގުމަށް ހުރަސްއެޅުމުގެ ދައުވާ ސާބިތުވެގެންނެވެ.
ހަސަން ސައީދުގެ މައްޗަށް އެ ދައުވާކުރީ ފުލުހުންގެ އިދާރާއަށް ހާޒިރުވާން އެންގުމުން ފިލައިގެން އުޅުނު ކަމަށް ބުނެ އެވެ. އެކެއް ފެބުރުއަރީގައި ސުޕްރީމް ކޯޓުން ނެރުނު އަމުރަށްފަހު ހަސަން ސައީދު ހައްޔަރުކުރަން ކުރިމިނަލް ކޯޓުން އަމުރެއް ނެރުނެވެ. އެ އަމުރު ތަންފީޒުކުރަން އޭނާ ދިރިއުޅުއްވާ ގެއަށް ފުލުހުން ވަނެވެ. ނަމަވެސް ހަސަން ސައީދު އޭރު އެ ގޭގައި ނޫޅުއްވަ އެވެ. އޭގެފަހުން އޭނާ ހޯދުމަށް ވެސް ފުލުހުން އިއުލާންކުރި އެވެ. ނަމަވެސް ފުލުހަށް ހާޒިރުވެފައެއް ނުވެ އެވެ.
މިއަދު މި މައްސަލާގައި ކުރިމިނަލް ކޯޓުގެ ގާޒީ އަލީ އާދަމް އިއްވެވި ހުކުމުގައި ބުނީ، ހަސަން ސައީދު ހައްޔަރުކުރަން ނެރުނު އަމުރު ތަންފީޒުކުރުމަށް އޭނާ ދިރިއުޅޭ ގެއަށް ފުލުހުން ދިޔަ ކަމަށާއި ދިޔައިރު އޭނާ ގޭގައި ނޫޅޭކަން ހެކި ބަސް ދިން ފުލުހުންގެ ހެކި ބަހުން ސާބިތުވާ ކަމަށެވެ. ފުލުހުން ގެއަށް ވަނީ ދޮރު ވައްޓާލައިގެންނެވެ. އެކަން ހިނގީ ފެބުރުއަރީ ހަތަރުވަނަ ދުވަހުގެ ފަތިހު އެވެ.
އެ ދުވަހުގެ މެންދުރުފަހު ހަސަން ސައީދު ހައްޔަރުކުރުމަށް ކުރިމިނަލް ކޯޓު ނެރުނު އަމުރު ބާތިލުކުރުމަށް ސުޕްރީމް ކޯޓުގެ ފަނޑިޔާރުންގެ މަޖިލީހެއް ބޭއްވި ކަމާއި އޭރު ހަސަން ސައީދު ވެސް އެތަނުގައި ހުންނެވިކަން ހެކި ބަސް ދިން ސިއްރު ހެކިބަސް ދިން ސުޕްރީމް ކޯޓުގެ ދެ މުވައްޒަފުންގެ ހެކި ބަހުން ސާބިތުވާ ކަމަށް ވެސް ހުކުމުގައިވެ އެވެ. އެހެންކަމުން އޭނާ ހައްޔަރުކުރުމަށް ކޯޓުން އަމުރެއް ނެރެފައިވާ ކަމާއި އެ އަމުރު ތަންފީޒުކުރުމަށް ފުލުހުން މަސައްކަތް ކުރާކަން އޭނާއަށް އެނގޭކަން އެނގެން އެބަ އޮތް ކަމަށް ވެސް ހުކުމުގައިވެ އެވެ.
ކޯޓުން އަމުރާ އެއްގޮތަށް ހައްޔަރުކުރުމަށް ހޯދިއިރު ނުފެނި، ފުލުހުން އިއުލާން ކުރުމުން ވެސް ފުލުހަށް ހާޒިރުނުވެ ފިލައިގެން އުޅުމަކީ ގާނޫނު ހިންގުމަށް ހުރަސް އެޅުން ކަމަށާއި އެހެންވެ، ހެކީންގެ ހެކި ބަހުން އެއްވެސް ޝައްކެއް ނެތް މިންވަރަށް ހަސަން ސައީދު ގާނޫނު ހިންގުމަށް ހުރަސް އަޅާފައިވާ ކަމަށް ސާބިތުވާ ކަމަށް ގާޒީ އަލީ އާދަމްގެ ހުކުމުގައިވެ އެވެ.
ހަސަން ސައީދުގެ މައްޗަށް ކުށް ސާބިތުވާ ކަމަށް ކަނޑައެޅުމަށްފަހު އަދަބާ ގުޅޭ ގޮތުން ވާހަކަ ދެއްކުމަށް ދެ ފަރާތަށް ވެސް ވަނީ ފުރުސަތު ދީފަ އެވެ. މި ކުށަކީ އެއްވަނަ ދަރަޖައިގެ ކުށަކަށްވާއިރު ދައުލަތުގެ ވަކީލް އަހުމަދު ނައުޝާދު ވިދާޅުވީ، އަންނާނެ ހުކުމަކީ ހަތަރު މަހާއި 24 ދުވަހުގެ ޖަލު ހުކުމެއް ކަމަށެވެ. އަދަބު ލުއި އަދި ބޮޑު ކުރާނެ ހާލަތެއް ނެތް ކަމަށެވެ.
ހަސަން ސައީދުގެ ވަކީލް ނޫރުއްސަލާމް އަބޫބަކުރު ވިދާޅުވީ އޭނާ މިހާރު ވެސް ފަސް މަސް ބަންދުގައި ބެހެއްޓިއްޖެ ކަމަށާއި އެހެންވެ އެ މުއްދަތު ހުކުމުން ކަނޑައި، އިތުރަށް ތަންފީޒު ކުރާނެ މުއްދަތެއް ނެތް ކަމަށް ކަނޑައަޅައިދިނުމަށް އެދޭ ކަމަށެވެ. ހަސަން ސައީދު ޝަރީއަތް ނިމެންދެން ބަންދުކުރީ ރިޝްވަތުގެ މައްސާލަގަ އެވެ.
ދައުލަތުގެ ވަކީލް ވިދާޅުވީ، އެއީ މުޅިން އެހެން މައްސަލައެއް ކަމަށާއި މި މައްސަލަ އާއި އެ މައްސަލާ ގުޅުމެއް ނެތުމުން އެ ބަންދުގެ މުއްދަތު މި އަދަބުން ނުކެނޑޭ ކަމަށެވެ. ނޫރުއްސަލާމް ދެން އެދުނީ ޖަލު ހުކުމް ގޭބަންދަކަށް ބަދަލުކޮށްދިނުމަށެވެ. އަދި، ރިޝްވަތުގެ މައްސަލާގައި ޝަރީއަތް ނިމެންދެން ބަންދުކުރުމުގެ ކުރިން ބަންދުގައި ހުރި އެއް މަސް ދުވަސް ކުށުގެ އަދަބުން އުނިކޮށްދިނުމަށެވެ.
ގާޒީ އަލީ އާދަމް ނިންމެވީ، އަދަބަށް ލުޔެއް ދޭން ޖެހޭ ސަބަބެއް ނެތް ކަމަށެވެ. އެހެންވެ ހަތަރު މަހާއި 24 ދުވަހުގެ ޖަލު ހުކުމެއް ހަސަން ސައީދަށް އިއްވެވި އެވެ. އަދި ޝަރީއަތް ނިމެންދެން ބަންދުގައި ހުރި މުއްދަތު އަދަބުން އުނިކުރަންޖެހޭނަމަ އެކަން ކަރެކްޝަނަލް ސާވިސްއަށް އަންގަވާނެ ކަމަށް ވެސް ވިދާޅުވި އެވެ.
ހަސަން ސައީދުގެ މައްޗަށް ހަތަރު މަހާއި 24 ދުވަހުގެ ޖަލު ހުކުމެއް މިއަދު އިއްވިިއިރު އޭނާގެ މައްޗަށް އުފުލާފައިވާ ރިޝްވަތުގެ ދައުވާގެ އިބްތިދާއީ އަޑުއެހުންތައް ވެސް އަދި ނުފަށަ އެވެ.