ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ފީފާ އިން ފޮނުވި ފައިސާތަކަށް ހިޔާނާތްތެރިވި ކަމުގެ ތުހުމަތުގައި އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް އުފުލާފައިވާ ދެ ދައުވާއަކަށް ދިފާއުވުމަށް، ބައްސާމްގެ ފަރާތުން ހެއްކެއްގެ ގޮތުގައި ސީނިއާ ވައިސް ޕްރެޒިޑެންޓްގެ އަހްމަދު ޝަކީބް (ޑޮކް) އަދި ކުރީގެ ޖެނެރަލް ސެކެއްޓްރީ ހުސެއިން ޖަވާޒު ހުށަހަޅައިފިއެވެ.
ބައްސާމްގެ މައްޗަށް ދައުލަތުން އުފުލާފައިވާ ދައުވާތަކުގެ ތެރެއިން، ދެ ދައުވާއެއްގެ އަޑު އެހުމެއް މިއަދު ކްރިމިނަލް ކޯޓުގައި ކުރިއަށް ގެންގޮސްފައެވެ.
މި ދައުވާތަކަށް ކުރިން ބައްސާމްގެ ފަރާތުން، އިންކާރުކޮށްފައިވާއިރު، މިއަދު އޮތް އަޑު އެހުމުގައި ބައްސާމްގެ ވަކީލް ވިދާޅުވީ، އެފްއޭއެމަށް ލިބުނު ފައިސާއަކަށް ބައްސާމް ހިޔާނަތްތެރިވެފައި ނުވާނެ ކަމަށެވެ. ވަކީލް ވިދާޅުވީ، ބައްސާމްއަށް ލިބިވަޑައިގެންނެވި ފައިސާއަކީ އޭނާގެ މުސާރަ ކަމަށެވެ. މުސާރައިގެ ގޮތުގައި ބައްސާމަށް މަހަކު 3،000 ޑޮލަރު ލިބޭ ކަމަށް ވަކީލް ވިދާޅުވިއެވެ.
ވަކީލު ކޯޓުގައި މިއަދު ވިދާޅުވީ އޭނާއަށް ލިބުނު ފައިސާއަކީ ފީފާއިން އޭނާއަށް ދިން މުސާރަ ކަމަށެވެ. އެހެންކަމުން މި ދައުވާއަކީ ކުރިއަށް ގެންދެވޭނެ ދައުވާއެއް ނޫންކަން ފާހަގަކޮށް، ބައްސާމްގެ ވަކީލް ވިދާޅުވީ، މައްސަލަ ކުރިއަށް ގެންދާނެ ތަނެއް ނެތް ކަމަށް ކަނޑައަޅައި ދިނުމަށެވެ.
ބައްސާމްގެ މައްޗަށް ފުރަތަމަ ދެ ދައުވާކުރީ ފީފާއިން ފޮނުވި ފައިސާގެ ތެރެއިން 10،000 ޑޮލަރު އޭނާގެ އަމިއްލަ އެކައުންޓަށް ފޮނުވައި، އަމިއްލަ ކަންކަމަށް ބޭނުންކޮށްފައި ވާތީ ކަމަށް ޕީޖީ އޮފީހުން ކުރިން ވަނީ ބުނެފަ އެވެ.
ޝަރީއަތުގެ ކުރިން ހުށަހަޅާ ހުށަހެޅުމެއްގެ ގޮތުގައި މިއަދު އޮތް އަޑު އެހުމުގައި ބައްސާމްގެ ފަރާތުން ހުށަހެޅި މި ނުކުތާއާ މެދު ގޮތެއް ނިންމަވަމުން، މައްސަލަ ބައްލަވާ ކްރިމިނަލް ކޯޓުގެ ފަނޑިޔާރު ވިދާޅުވީ، ބައްސާމްގެ ހުށަހެޅުން ޝަރީއަތަށް ބަލައި ނުގަންނާނެ ކަމަށެވެ.
މި މައްސަލައިގައި ޕީޖީ އޮފީހުން ކުރިން ބުނެފައިވަނީ އެފްއޭއެމްގެ ރައީސްކަމުގެ މަގާމުގައި ބައްސާމް ހުރިއިރު ބޭންކް އޮފް ސިލޯންގައި އޮތް އެފްއޭއެމްގެ އެކައުންޓަކަށް، 2018 ވަނަ އަހަރުގެ ޖުލައި މަހާއި އޯގަސްޓް މަހާ ދެމެދު ފީފާއިން ޖަމާކޮށްފައިވާ ފައިސާގެ ތެރެއިން 10،000 ޑޮލަރު ބޭންކަށް ލިޔުންތަކެއް ހުށަހަޅައިގެން ބައްސާމްގެ ބީއެމްއެލް އެކައުންޓަކަށް އޯގަސްޓް، 2018 ގައި ޖަމާކޮށްފައިވާ ކަމަށެވެ. އެ ފައިސާ ޖަމާކުރީ ބޭންކް ޗާޖުތައް އުނިކުރުމަށް ފަހު ކަމަށް ވާތީ ބައްސާމްގެ އެކައުންޓަށް ޖަމާވީ 9،999 ޑޮލަރެވެ. މި ފައިސާގެ ތެރެއިން 1،910 ޑޮލަރު އެހެން މީހެއްގެ އެކައުންޓަށް ޖަމާކުރުމަށް ފަހު، ބައްސާމް އާއި އޭނާގެ އަނބިކަނބަލުން އައިމިނަތު މައުރީނާގެ ހިއްސާ އޮންނަ ގްލޭސިއާ އިންވެސްޓްމަންޓްގެ އެކައުންޓަށް އެ ފައިސާ ޖަމާކޮށް އެ ކުންފުނީގެ އެކި ކަންކަމަށް ބޭނުންކޮށްފައިވާ ކަމަށް ޕީޖީ އޮފީހުން ބުންޏެވެ.
މީގެ އިތުރުން ބައްސާމް ކުއްޔަށް ނަގައިގެން އުޅުނު ރެހެންދި ފްލެޓްގެ ކުލި ދެއްކުމަށާއި އެފްއޭއެމްއާ އެއްވެސް ގުޅުމެއް ނެތް ކަންކަމަށް، އެ ފައިސާ ބައްސާމް ބޭނުންކޮށްފައިވާ ކަމަށް ދައުވާގައި ބުނެފައިވެ އެވެ.
މި ދައުވާގައި ދައުލަތުން ވަނީ މި 10،000 ޑޮލަރު ދައުލަތަށް ނަގައިދިނުމަށް އެދިފަ އެވެ.
މި ކުށުގެ އަސާސީ އަދަބަކީ 10،000 ޑޮލަރާއި އެއް މިލިއަން ޑޮލަރާ ދެމެދުގެ އަދަދަކުން ޖޫރިމަނާކުރުމާ އެކު ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލަށް ލުމެވެ.
