އިންޑިއާގެ މަޝްހޫރު ފިލްމު ޕްރޮޑަކްޝަން ހައުސް، ޒީ ސްޓޫޑިއޯސްއާއެކު ތިން ފިލްމެއްގައި މަސައްކަތްކުރުމަށް ޝާހިދު ކަޕޫރް ސޮއިކޮށްފި އެވެ. ޕްރޮޑަކްޝަން ހައުސްތަކުން މިގޮތަށް އެއް އެކްޓަރަކާއެކު ގިނަ ފިލްމުތަކެއްގައި އެއް ފަހަރާއި ސޮއިކުރުމަކީ އެހާ އާންމުކަމެއް ނޫނެވެ.
ޝާހިދު މިހާރު މަސައްކަތްކުރަމުން އަންނަ ފިލްމު "ބައްޓީ ގުލް މީޓަރު ޗާލޫ" ގެ ބޮޑުބައެއް މިހާރު ވަނީ ނިމިފަ އެވެ. އެ ފިލްމުގެ މަސައްކަތްވެސް ކުރިއަށްދާން ފެށީ ގިނަ އަޑިގުޑުންތަކަކާއި ކުރިމަތިލުމަށްފަހު އެވެ. ޝާހިދުއަށް ވަނީ ޓޮލީވުޑްގެ ފިލްމު "އަރްޖުން ރެއްޑީ" ގެ ހިންދީ ފިލްމު ކުޅުމަށްވެސް ފުރުސަތު ލިބިފަ އެވެ.
ޒީ ސްޓޫޑިއޯސްއާއެކު ޝާހިދު ކުޅެން އެއްބަސްވި ތިން ފިލްމުގެ ތަފްސީލު އަދި ހާމަކޮށްފައެއް ނުވެ އެވެ. ނަަމަވެސް ރިޕޯޓުތައް ބުނާގޮތުން އެ ސްޓޫޑިއޯއިން ޝާހިދުއާއެކު ގިނަ ފިލްމުތަކެއްގައި އެއް ފަހަރާ ސޮއިކުރީ، އެމީހުނަށް ޝާހިދުއަކީ ސުޕަސްޓާރެއްގެ ގޮތުގައި ފެންނާތީ ކަމަށެވެ. އަދި އޭނާގެ ފިލްމުތައް ކާމިޔާބުވުމުން ކަމަށް ބެލެވޭކަމަށްވެސް ބުނެފައިވެ އެވެ.
ފިލްމުތަކުގެ މަސައްކަތްތައް ކުރިއަށް ހުރިއިރު، ޝާހިދުގެ އަންހެނުން މިރާ މިހާރު އިނީ އެ ދެމަފިރިންގެ ދެ ވަނަ ދަރިފުޅަށް ބަލިބެ އިނދެ އެވެ.