ނަވާރަސްތޭކަ ނުވަދިހާގައި ނިކުތް ކޮމެޑީ ފިލްމު "ހޯމް އެލޯން" އަކީ މިހާރުވެސް ގިނަ ބައެއްގެ ކުޑައިރުގެ ފޭވަރިޓް ފިލްމެވެ. މި ފިލްމަކީ ޓުވެންޓިއެތު ސެންޗުރީ ފޮކްސްއިން ގެނެސްދިން އެންމެ ކާމިޔާބު ކޮމެޑީ ފިލްމުތަކުގެ ތެރޭގައި ހިމެނޭ ފިލްމެވެ. އަދި ބޮކްސް އޮފީހުގައިވެސް ވާނީ ރަނގަޅު ކާމިޔާބީއެއް ހޯދާފަ އެވެ.
މި ފިލްމު ކަހަލަ އާ ފިލްމެއް ގެނެސްދިނުމަށް ފޮކްސް ސްޓޫޑީއޯއިން މިހާރު އަންނަނީ ތައްޔާރުވަމުންނެވެ. އާ ފިލްމަށް ދީފައިވާ ނަމަކީ "ސްޓޯންޑް އެލޯން" އެވެ. "ހޯމް އެލޯން" ގެ ހަތަރު ފިލްމެއް މީގެ ކުރިންވެސް ހަމަ އެ ސްޓޫޑިއޯއިން ގެނެސްދީފައިވެ އެވެ.
ވެރައިޓީން ރިޕޯޓުކުރި ގޮތުގައި މި ފިލްމު ޕްރޮޑިއުސްކުރާނީ "ޑެޑްޕޫލް" ގެ ތަރި ރަޔަން ރެނޮލްޑްސް އެވެ. މި ފިލްމުގައި ލީޑު ރޯލުންވެސް ފެނިގެންދާނީ އޭނާ ކަމަށް ބުނެފައިވެ އެވެ. މި ފިލްމު ޑައިރެކްޓުކުރަނީ ކޮމެޑީ ފިލްމު "ނެވާ ގޮއިން ބެކް" ގެ ޑައިރެކްޓަރު އޮގަސްޓިން ފްރިޒެލް އެވެ.
ކެވިން ބުރޯޒްއާއި މެޓް މައިޑާ ސްކްރީންޕްލޭގެ ލިޔެފައިވާ މި ފިލްމުގައި ގެނެސްދޭނީ 20 އަހަރުގެ ފިރިހެނަކު ޗުއްޓީ ހޭދަކުރުމަށް އޭނާ ދާން އުޅުނު ދަތުރު، ފްލައިޓް މިސްވުމާއެކު ނުދެވިގެން އަނބުރާ ގެއަށް އަންނަތަނުން ދިމާވާ ކަންތައްތަކެއްގެ މައްޗަށެވެ. ގެއަށް އަންނައިރު ވަގުންތަކެއް ގެ ފަޅާލައިގެން އުޅޭކަން ފާޅާއަރަ އެވެ.
"ހޯމް އެލޯން" ގައި ގެނެސްދިނީ އަށް އަހަރުގެ ފިރިހެން ކުއްޖެއްގެ އާއިލާގެ މީހުން ހަނދާނެތިގެން އެ ކުއްޖާ ނުލާ، ގޭގައި ބަހައްޓާފައި ޗުއްޓީއަށް ދިއުމުން އެ ކުއްޖާއަށް ދިމާވި ކަންތައްތަކެއް މައްޗަށެވެ. އެ ފިލްމުގައިވެސް އެގެއަށް ވަގުތަކެއް ވަދެ އެވެ. އަދި އެ ވަގުން ކިބައިން ސަލާމަތްވުމަށް ކުރާ ކަންކަން ދައްކުވައިދެ އެވެ.