ދިވެހި ސިފައިންގެ ތަފާތު ހުނަރުތައް ދައްކައިލާ މިނިވަންދުވަހުގެ ޝަރަފުގެ ހިނގާލުން މާދަމާ ހަވީރު 4:00 ގައި މާލޭގައި ބާއްވަން ނިންމައިފި އެވެ.
ސިފައިންގެ ޝަރަފުގެ ހިނގާލުން ނުވަތަ ޕެރޭޑަކީ މިނިވަންދުވަހުގެ ހަރަކާތްތަކުގެ ތެރެއިން އެންމެ ގިނަ ބަޔަކު އެންމެ އިންތިޒާރުކުރާ ހަރަކާތެވެ. މި ޕެރޭޑް މިދިޔަ އަހަރު ބޭއްވީ ހުޅުމާލޭގަ އެވެ.
އެމްއެންޑީއެފުން ބުނީ، މިހާރު ފާހަގަކުރަމުންދާ ރާއްޖޭގެ 53 ވަނަ މިނިވަން ދުވަހުގެ މުނާސަބަތުގައި ބާއްވާ ދިވެހި ސިފައިންގެ ޝަރަފުގެ ހިނގާލުން ޖުލައި 29 ވާ އާދީއްތަ ދުވަހު މާލޭޣައި ބާއްވަން ނިންމާފައިވާއިރު، ހިނގާލުން ފަށައިގަންނާނީ މާދަމާ ހަވީރު 4:00 ގައި ބަންޑާރަކޮށިން ކަމަށެވެ. އަދި ޕެރޭޑްގެ ސަފުތަށް ބަންޑާރަކޮށިން ނިކުމެގެން ބޮޑުތަކުރުފާނުމަގުން ޖުމްހޫރީ މައިދާނުން ހުޅަނގަށް ގޮސް ޗާންދަނީމަގުން އޯކިޑްމަގަށް އަޅައި، މަޖީދީމަގުން އިރަށް ގޮސް ސޯސަންމަގުން މެދުޒިޔާރަތްމަގަށް އެޅުމަށްފަހު ވެލާނާ ބިލްޑިން ކައިރިން އަމީރުއަހްމަދު މަގަށް އަޅައި ނިންމާލާނީ ބަންޑާރަކޮއްޓަށް ކަމަށެވެ.
ޝަރަފުގެ މިހިނގާލުމުގައި ހިލާލީގޭ ކުރިމަތީގައާއި، މަޖީދީމަގުން ކުރީގެ އޯޑިއޯން ހުރި ސަރަހައްދުގެ ކުރިމަތީގައާއި، ރަސްމީ ބޯޅަދަނޑު ކުރިމަތިން އަދި ސޯސަންމަގުން ސޯސަންގެ ކުރިމަތީ މަޑުކޮށް ސިފައިންގެ ބޭންޑުގައި ރާގުތައް ކުޅޭނެއެވެ.
މި ޝަރަފުގެ ހިނގާލުމުގައި ގިނަ އަދަދެއްގެ ސިފައިން ބައިވެރިވާނެއެވެ.