ސިއްރު ފެންފުށި ތަރައްގީކުރުމުގައި ހިއްސާއެއް މިހާރު ނޯންނާނެ ކަމަށާއި، އަދި އެ ރިސޯޓް ތަރައްގީކުރާ ފަރާތާއި އެމްޑީޕީގެ އެއްވެސް މަޖިލިސް މެންބަރަކާއި ވެސް ގުޅުމެއް ނޯންނާނެ ކަމަށް ކޮމަންޑޫ ދާއިރާގެ މެންބަރު، އަހްމަދު ނާޝިދު ވިދާޅުވެއްޖެ އެވެ.
ސިއްރު ފެންފުށީގައި ހަދާފައިވާ އަންޑަވޯޓާ އާޓް ގެލެރީއާއި ބެހޭގޮތުން ޕީއެސްއެމުން ޝާއިއުކުރި ހަބަރަކާ ގުޅިގެން ނާޝިދު މިއަދު ނެރުއްވި ބަޔާނެއްގައި ވިދާޅުވީ، ސިއްރުފެންފުށި ރިސޯޓް ތަރައްގީކުރާ ށ ގާކޮށިބީ އަކީ އޭނާގެ ހިއްސާ އޮވެގެން ތަރައްގީކުރާ ރިސޯޓެއް ކަމަށް އެ ސްޓޭޝަނުން ބުނެ ހަބަރުފެތުރީ ހަގީގަތާއި ހިލާފަށް ކަމަށެވެ. އެ ރިސޯޓް މިހާރު ތަރައްގީކުރަނީ އޭނާއާ ވިޔަފާރީގެ ގޮތުން އެއްވެސް ގުޅުމެއް ނޯންނަ ޖީބީއެޗް ނަމަކަށް ކިޔާ ކުންފުންޏަކުން ކަމަށް ނާޝިދު ވިދާޅުވި އެވެ.
ސިއްރުފެންފުށި ރިސޯޓާ ބެހޭގޮތުން ޕީއެސްއެމުން ލިޔުނު ހަބަރުގައި ބުނެފައިވަނީ، ށ. ގާކޮށިބީގައި ރިސޯޓެއް ތަރައްގީ ކުރުމަށް އެންމެ ފުރަތަމަ ހަވާލުކުރީ ރައްޔިތުންގެ މަޖިލީހުގެ އޭރުގެ އެމްޑީޕީ މެންބަރު ޢަލީ ރިޒާއަށް ކަމަށެވެ. ނަމަވެސް ފަހުން އެމްޑީޕީގެ އަލީ ރިޒާވަނީ މިހާރުގެ އެމްޑީޕީގެ ޕާލަމެންޓަރީ ގުރޫޕްގެ ކޮމަންޑޫ ދާއިރާގެ މެންބަރު އޭޑީކޭ ނާޝިދުގެ މަސްލަހަތު އޮންނަ ކުންފުންޏަކަށް އެ ރަށް ވިއްކާލާފަ ކަމަށް ވެސް ޕީއެސްއެމްގެ ހަބަރުގައިވެ އެވެ.
އެ ހަބަރު އިސްލާހުކުރުމަށް އެދި ނާޝިދު ވިދާޅުވީ، ށ ގާކޮށިބީއަކީ 2006 ވަނަ އަހަރު ޓޫރިޒަމް މިނިސްޓްރީން، ށ ފޯކައިދޫ، ހުވަނދުމާގެ ހުސައިން ވަހީދު ނަމަކަށް ކިޔާ މީހަކަށް ކުއްޔަށް ދީފައިވާ ކަމަށެވެ. އަދި އެރަށުގައި ރިސޯޓެއް ހެދުމަށް އެރަށުގެ ސަބް ލީސް ގަތުމަށް، އެކެއް ނޮވެމްބަރު 2007ގައި އޭޑީކޭ އަކާސޫ ޑިވޮލޮޕްމަންޓްސް ޕްރައިވެޓް ލިމިޓެޑާއި ހެޑްލީސް އޯނަރާއި ދެމެދު ވެވުނު އެއްބަސްވުމުގެ ދަށުން އެ ރަށުގައި ރިސޯޓެއް ހެދުމުގެ މަސައްކަތްތަކެއް ކޮށްފައިވާނެ ކަމަށެވެ. އޭޑީކޭ އަކާސޫ ކުންފުންޏަކީ އޭނާގެ މަސްލަހަތު އޮންނަ ކުންފުންޏެއް ނަމަވެސް، އެ ކުންފުނިން އެރަށުގައި ކުރި މަސައްކަތްތައް ނުނިމެނީސް ބައެއް ސަބަބުތަކާހެދި، ކުންފުނިން އެރަށުގައި ކޮށްފައިވާ އިންވެސްޓްމަންޓާއި ރަށުގެ ސަބްލީސްއާއި އެއްކޮށް ޖީބީއެޗް މޯލްޑިވްސް ރިސޯޓްސް ޕްރައިވެޓް ލިމިޓެޑަށް ވިއްކާލާފައިވާ ކަމަށެވެ. އޭރު އެރަށް ތަރައްގީކުރުމުގެ ކޮންސެޕްޓުގައި ގަލުން މިއުޒިއަމެއް ހެދުމަށް ހިމަނާފައިނުވާނެ ކަމަށް ވެސް ނާޝީދު ވިދާޅުވި އެވެ.
އެހެންކަމުން ސިއްރުފެންފުއްޓަކީ އެނާ، އަދި އެމްޑީޕީގެ އެހެންވެސް މަޖިލިސް މެންބަރެއްގެ ހިއްސާ އޮވެގެން ތަރައްގީކުރާ ތަނަކަށް ނުވާއިރު، ޕީއެސްއެމްގެ ހަބަރުން ހަގީގަތް އޮޅޭ ކަމަށެވެ. އޭނާ ވަނީ އަބުރު ރައްކާތެރިކޮށްދިނުމާއި ހިޔާލު ފާޅުކުރުމުގެ ގާނޫނާއި ހަވާލާދީ، އެ ލިޔުން އިސްލާހުކުރުމަށްވެސް އެދިފަ އެވެ.
ގާކޮށިބީގައި ތަރައްގީކުރަމުންއަންނަ ސިއްރުފެންފުށީގެ މައްސަލަ ފެންމަތިވެފައި ވަނީ އެ ރިސޯޓްގެ މޫދުއަޑީގައި ހެދި ގެލަރީއެއްގައި ބުދުތަކެއް ބެހެއްޓުމާއި ގުޅިގެންނެވެ. އެ މައްސަލަ އާންމުވީ ސޯޝަލް މީޑިއާގަ އެވެ. އަދި ސަރުކާރާ އިދިކޮޅު ފަރާތްތަކުން ވަނީ، ރާއްޖެއަށް ބުދުތަކެއް އެތެރެކޮށް ރިސޯޓެއްގައި އެތަކެތި ބެހެއްޓުމަކީ ދީނާ ހިލާފުކަމެއް ކަމަށް ބުނެ ސަރުކާރަށް ސޯޝަލް މީޑިއާގައި ފާޑުކިޔައިފަ އެވެ.
ޓޫރިޒަމް މިނިސްޓްރީން މިހާރު ވަނީ ގެލެރީ އެތަނުން ނެގުމަށް އަންގާފަ އެވެ.