ގާނޫނުލް އުގޫބާތައް ސަރުކާރުން ހުށަހަޅާފައިވާ އިސްލާހުތަކުގައި ރިޝްވަތުގެ ކުށް އުނިކުރަން ހިމަނާފައި ވާތީ، ގާނޫނީ ވަކީލުންނާއި ސިޔާސީ ބޭފުޅުން އަދި ދީނީ އިލްމްވެރިން ކަންބޮޑުވުން ފާޅުކުރައްވަން ފައްޓަވައިފި އެވެ.
ސަރުކާރުގެ ފަރާތުން ފޭދޫ ދާއިރާގެ މެންބަރު، އިބްރާމް ދީދީ އައިބީ ގާނޫނުލްއަގުބާތައް ހުށަހަޅުއްވާފައިވާ އިސްލާހުތަކުގައި އެ ގާނޫނުގެ 510 ވަނަ މާއްދާ އުވާލަން ވަނީ ހުށަހަޅައިފަ އެވެ. އެ މާއްދާއަކީ ދައުލަތުގެ މުވައްޒަފުންނަށް ރިޝްވަތު ދިނުމާއި ހިފުމާ ގުޅޭ މާއްދާ އެވެ. އެ އިސްލާހުތައް މަޖިލީހަށް ބަލައިގަނެ ގައުމީ ސަލާމަތުގެ ކޮމިޓީއިން ވަނީ އެ މައްސަލަ މިހާރު ދިރާސްކޮށް ފާސްކުރަން ތަޅުމަށް ހުށަހަޅަން ފޮނުވައިފަ އެވެ.
ގާނޫނީ ވަކީލަކު ވިދާޅުވީ، އެ މާއްދާ އުވާލައިފި ނަމަ، ރިޝްވަތު ދިނުމާއި ރިޝްވަތު ހިފުމަކީ ހުއްދަ ކަމެއްގެ ގޮތުގައި ބެލެވޭނެ ކަމަށެވެ. އަދި ރިޝްވަތުގެ ކުށްތަކުގައި ދައުލަތުގެ މުވައްޒަފުންނަށް އަދަބެއް ދެވޭނެ އުސޫލެއް އޭރުން ނޯންނާނެ ކަމަށް ވެސް ވަކީލް ވިދާޅުވި އެވެ. ރާއްޖޭގައި ރިޝްވަތު ދިނުމާއި ރިޝްވަތުގެ ކަންތައްތައް އެހާ ބޮޑުވެފައިވާ އިރު މިފަދަ ބަދަލެއްގެ ސަބަބުން އެކަންކަން ހުއްޓުވަން ހުރަސްއެޅޭނެ ކަމަށް ވެސް ގާނޫނީ ވަކީލް ވިދާޅުވި އެވެ.
"މިފަދަ އިސްލާހެއް ގެންނާތީ އަޅުގަނޑު ހައިރާންވޭ. އަބަދުހެންމެ އިވެނީ މަޖިލިސް މެންބަރުންނާއި ފަނޑިޔާރުންނާއި މިހެން ގޮސް އެކި މަގާމުތަކުގައި ތިބޭ ބޭފުޅުން ރިޝްވަތު ނަންގަވައިގެން ކަންކަން ކުރައްވާ ވާހަކަ. އެހެން ނަމަވެސް މިފަދަ ކަންކަމުގެ ސަބަބުން، ރިޝްވަތުގެ ވަބާ ފިލުވާލަން އުނދަގޫވާނެ،" ގާނޫނީ ވަކީލް ވިދާޅުވި އެވެ.
ދީނީ އިލްމްވެރިޔާ ޑރ. މުހައްމަދު އިޔާޒު ވިދާޅުވީ، ރިޝްވަތު ދިނުމަކީ އިސްލާމް ދީނުގައި ހަރާމް ކުރައްވާފައިވާ ކަމެއް ކަމަށެވެ. އިޔާޒު ވިދާޅުވީ، އެ ކުށްކުރާ މީހުންނަށް ބޮޑުވެގެންވާ ލައުނަތް ހުރި ކަމަށް ރަސޫލާގެ ހަދީސްތަކުން ސާފުބަހުން އެނގެން އޮންނަ ކަމަށެވެ. އަދި އެފަދަ ނުބައި ހުތުރު އަމަލަކަށް ހިތްވަރު ލިބޭ ގޮަތަށް ގާނޫނަށް ބަދަލު ގެނައުމަކީ އިސްލާމީ ގައުމެއްގައި ކުރަން ހެޔޮވާވަރު ކަމެއް ނޫން ކަމަށް ވެސް އިޔާޒު ވިދާޅުވި އެވެ.
އިދިކޮޅުގެ ރަނިންމޭޓް ފައިސަލް ނަސީމް ވިދާޅުވީ، އެމްއެމްޕީއާރުސީގެ ބޮޑު ކޮރަޕްޝަނަށް ވެސް މަގުފަހިވީ ރިޝްވަތުގެ ސަބަބުން ކަމަށެވެ. ފައިސަލް ވިދާޅުވީ ރާއްޖޭގައި މިހާތަނަށް ހިނގި އެންމެ ބޮޑު ކޮރަޕްޝަން ވެސް މިކަމުން މަގުފަހިވީ އިރު، ދައުލަތުގެ އެކި ފަންތިތަކުގައި ރިޝްވަތު ހިފުމުގެ ވަބާ އޮތް ކަމަކީ އެންމެ ދަންނަ ހަގީގަތެއް ކަމަށެވެ. މިކަން މިހެން އޮތް އިރު، ރިޝްވަތަކީ ކުށެއް ނޫން ކަމަށް ހެދުމަކީ ބަލައިގަނެވޭނެ ކަމެއް ނޫން ކަމަށް ފައިސަލް ވިދާޅުވި އެވެ.
އެ ގާނޫނަށް ދެން ހުށަހަޅާފައި ހުރި އިސްލާހުތަކުގެ ތެރޭގައި، ވެރިކަން ވައްޓާލަން އުޅުމުގެ ކުށާއި އިގްތިސާދާ ދެކޮޅު އަމަލެއް ހިންގުމުގެ ކުށާއި އިސްލާމީ ދީނާ ދެކޮޅު އަމަލެއް ހިންގުން އަދި ސިހުރު ހެދުމާއި ކުޑަކުދިން ވަގަށް ނެގުމުގެ ކުށް އެ ގާނޫނަށް އިތުރު ކުރުން ވެސް ހިމެނެ އެވެ. އަދި ބައެއް އަދަބުތައް ބޮޑުކުރުން ވެސް ހިމަނާފައިވެ އެވެ.