ގާނޫނީ ވަކީލުންގެ އެންމެ އިސް އެއް ވާޖިބަކީ ތެދުވެރިކަމާއި ޒިންމާދާރުކަމާއެކު ހިދުމަތް ކުރެއްވުން ކަމަށް އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާވެއްޖެ އެވެ.
ގާނޫނީ ވަކީލްކަމުގެ ހުއްދަ ދިނުމަށް މިރޭ ދަރުބާރު ގޭގައި ބޭއްވި ރަސްމިއްޔާތުގައި އުއްތަމަ ފަނޑީޔާރު ވިދާޅުވީ، ވަކީލުން ފޯރުކޮށްދޭ ހިދުމަތަކީ ގާނޫނުގެ ސިޔާދަތު ދަމަހައްޓައި ގައުމީ މަސްލަހަތާއި ގާނޫނީ މަސްލަހަތުގެ އިތުރުން ފަރުދީ މަސްލަހަތުތައް ހިމާޔަތްކޮށް ރައްކާތެރި ކުރުމަށްޓަކައި ފޯރުކޮށްދޭ ވަރަށް މުހިންމު ހިދުމަތެއް ކަމަށެވެ. އަދި ވިދާޅުވީ، ވަކީލުންނަކީ ރައްޔިތުންގެ އަސާސީ ހައްގުތަކާއި އެނޫންވެސް ހައްގުތައް ރައްކާތެރި ކުރުމަށްޓަކައި މަސައްކަތް ކޮށްދޭބައެއް ކަމަށެވެ.
"އެހެންކަމުން އެހިދުމަތުގެ ދާއިރާގައި އުޅުއްވާ ބޭފުޅުންނާއި އެދާއިރާއަށް އަލަށް ގުޅިވަޑައިގަންނަވާ ބޭފުޅުންވެސް އެންމެ އިސް އެއް ވާޖިބެއްގެ ގޮތުގައި ދެކެވަޑައިގަންނަވަން ޖެހޭނީ ތެދުވެރިކަމާއި ޒިންމާދާރު ކަމާއެކު ހިދުމަތް ކުރެއްވުމަށް،" އުއްތަމަ ފަނޑިޔާރު ވިދާޅުވި އެވެ.
އުއްތަމަ ފަނޑިޔާރު ވިދާޅުވީ، އިސްލާމްދީނަށް ހުރުމަތްތެރިކޮށް ހިތުމަށާއި ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއަށާއި ރާއްޖޭގެ ގާނޫނުތަކަށާއި ގަވާއިދުތަކަށް ރައްކާތެރިވެ ތިބުމަށާއި ރައްޔިތުންގެ އަސާސީ ހައްގުތަކަށް ރައްކާތެރިވެ ތިބެ ޒިންމާ އަދާކުރުމުގައި ތެދުވެރިވެވަޑައިގަތުމާއި އަމާނާތްތެރިވެވަޑައިގަތުމަށް ހުވާކޮށް އެހުވަޔާ އެއްގޮތަށް އަމަލު ކުރުމަށް ގާނޫނީ ވަކީލުންގެ ކޮނޑުގައި އެޅިގެންދަނީ މަތިވެރި ޒިންމާއެއް ކަމަށެވެ.
"މިރޭ ތިވަނީ ހުވައެއް ކުރައްވާފަ، އެ ހުވާ ހަނދުމަފުޅު ބެހެއްޓުމަކީ އެންމެ އިސް އެއް ވާޖިބު، އެންމެ އިސް ނަސޭހަތަކީ މި ވާޖިބާމެދު ފަރުވާތެރިވެ ވަޑައިގެންނެވުން،" އުއްތަމަ ފަނޑީޔާރު ވިދާޅުވި އެވެ.
އުއްތަމަ ފަނޑިޔާރު ވިދާޅުވީ، ޝަރުއީ އަދި ގާނޫނީ މަރުހަލާ ކަނޑަށްތު ކުރައްވައި ގާނޫނީ ވަކީލްކަުގެ ދާއިރާގައި ހިދުމަތްކުރުމުގެ ނަމުގައި މިރޭ ތިއެޅުއްވީ އެންމެ ފުރަތަމަ ފިޔަވަޅު ކަމަށާއި އުންމީދަކީ ކުރިއަށް އަޅުއްވާ ކޮންމެ ފިޔަވަޅަކީ އިސްލާމީ ގައުމީ ހިދުމަތެއްގެ މިސްރާބުން އަޅުއްވާ ސީދާ ފިޔަވަޅަކަށްވުން ކަމަށެވެ.
"ރާއްޖޭގައި އެންމެ ފުރަތަމަ ގާނޫނީ ވަކީލުން ހުވާކުރިތާ މިދިޔަ ޖޫން މަހުގެ 17 އަށް ވަނީ 67 އަހަރު ފާއިތުވެގެން ގޮސްފައި، 67 އަހަރަކީ ކުރު މުއްދަތެއް ނޫން، މި ދިގު މުއްދަތުގެ ތެރޭގައި ގާނޫނީ ޕްރޮފެޝަން ވަނީ ކުރިއެރުންތަކެއް ހޯދާފަ، އެހެން ނަމަވެސް ތަރައްގީއާ ކުރިއެރުމަކީ ވަކި ހިސާބަކުން ހުއްޓޭނެ ކަމެއް ނޫން، އެއީ ހިނގަ ހިނގާ އޮންނަ ކަމެއް،" އުއްތަމަ ފަނޑިޔާރު ވިދާޅުވި އެވެ.
އެހެން ކަމުން މިރޭ އަލަށް ގާނޫނީ ދާއިރާއަށް ގުޅިވަޑައިގަންނަވާ ބޭފުޅުން ގުޅިވަޑައިގަންނަވަން ވާނީ މިދާއިރާ އިތުރަށް ކުރިއަރުވާ ތަރައްގީ ކުރުމަށާއި މި ދާއިރާ ހިދުމަތްތައް އިތުރަށް ހަރުދަނާ ކުރުމަށް އެކަށީގެންވާ ގޮތެއްގައި ހިއްސާވުމުގެ ވަރުގަދަ އަޒުމާއެކު ކަމަށް އުއްތަމަ ފަނޑިޔާރު ވިދާޅުވި އެވެ.
އުއްތަމަ ފަނޑިޔާރު ވިދާޅުވީ، ޝަރުއީ ދާއިރާ މިނިވަންކަމާއި ހުރުމަތްތެރިކަމާއެކު ހިންގުމަށްޓަކައި ގާނޫނީ ވަކީލުންގެ ޒިންމާ ވަރަށްވެސް ބޮޑު ކަމަށެވެ. އަދި ގާނޫނުގެ ހުކުމްތައް އަދުލު އިންސާފަށް ފަސޭހަކޮށް ވާސިލްވުމަށްޓަކައި ވަކީލުންގެ މަސައްކަތަކީ ލޮރޫރަތްތެރި މަސައްކަތެއް ކަމަށްވެސް އުއްތަމަ ފަނޑިޔާރު ވިދާޅުވި އެވެ.
"މިކަންކަން ރަނގަޅަށް ކުރެވޭނީ ގާނޫނީ ވަކީލުންގެ ޕްރޮފެޝަން މިނިވަން ޕްރޮފެޝަނަކަށް ވެގެން، ހަރުދަނާ ސުލޫކީ އަދި އަހުލާގީ މިންގަނޑެއްގެ މަތީގައި ސާބިތުވެ ގާއިމްވެފައިވާ ޕްރޮފެޝަނަކަށްވެގެން، ރައްޔިތުންނާއި ސިވިލް ސޮސައިޓީގެ އިތުބާރާއި ޔަގީންކަން އެޕްރޮފެޝަނަކަށްދެވޭ ޕްރޮފެޝަނަށްވެގެން،" އުއްތަމަ ފަނޑިޔާރު ވިދާޅުވި އެވެ.
އުއްތަމަ ފަނޑިޔާރު ވިދާޅުވީ، ޔަގީންކަން އަރުވަން ބޭނުންވަނީ ރާއްޖޭގެ ޖުޑީޝަލް އެކަޑަމީ ތަރައްގީކޮށް ދުނިޔޭގައި ކުރިއަރާފައިވާ ގައުމުތަކުގައިވެސް ލިބޭފަދަ ތައުލީމު ވަކީލުންނަށް ފޯރުކޮށް ދިނުމަށްޓަކައި މަސައްކަތް ކުރާނެ ކަމުގެ ޔަގީންކަން ކަމަށެވެ.