މޯލްޑިވްސް އިންލެޑް ރެވެނިއު އޮތޯރިޓީން ދޭ، "ރަންލާރި" އެވޯޑުގައި ހިމެނޭ، އެންމެ ގިނައިން ޓެކްސް ދައްކާ ސަރުކާރު ކުންފުންޏަށް ދޭ ރަންލާރި ދިވެހިރާއްޖޭގެ ގުޅުން ޕްރައިވެޓް ލިމިޓެޑް( ދިރާގު) އަށް ލިބިއްޖެ އެވެ.
ދައުލަތުގެ ޓެކްސް އިދާރާ (މީރާ) އަށް އަށް އަހަރު ފުރުމުގެ މުނާސަބަތުގައި ދަރުބާރުގޭގައި މިރޭ ބޭއްވި ހާއްސަ ރަސްމިއްޔާތުގައި ސަރުކާރު ކުންފުނިތަކުގެ ތެރެއިން ޓެކްސްގެ ކަންތައްތައް އެންމެ ބަރާބަރަށް ފުރިހަމަކޮށް، އެންމެ ގިނައިން ޓެކްސް ދެއްކި ކުންފުނީގެ އެވޯޑާ ދިރާގުގެ ފަރާތުން ހަވާލުވެ ވަޑައިގަތީ އެ ކުންފުނީގެ ޗީފް ފައިނެންސް އޮފިސަރު ރޮބިން ރީއޯ އެވެ.
ދިރާގަށް މި އަހަރު މި އެވޯޑު ލިބުނުއިރު މިދިޔަ އަހަރު މި އެވޯޑު ލިބިފައިވަނީ މާލެ ވައިގެ ބަނދަރު ބަލަހައްޓާ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އަށެވެ.
ދިރާގުން ދަނީ ރާއްޖޭގެ ހުރިހާ ހިސާބަކަށް އިންޓަނެޓާއި ފޯނުގެ ހިދުމަތް ދެމުންނެވެ. އަދި ރާއްޖޭގެ ގިނަ ވިޔަފާރިތަކަށް ދިރާގުގެ އެހީތެރިކަން ދަނީ ލިބެމުންނެވެ.
ދިރާގަށް އެންމެ ގިނައިން ޓެކްސް ދެއްކި ސަރުކާރުގެ ކުންފުނީގެ "ރަންވަނަ" ލިބުނުއިރު، މިދިޔަ އަހަރު އެ ކުންފުނި ނިންމައިލީ މާލީ ގޮތުންވެސް ކާމިޔާބު އަހަރެއްގެ ގޮތުގަ އެވެ. ތަފާސްހިސާބުތައް ދައްކާ ގޮތުން މިދިޔަ އަހަރު ނިމުނު އިރު އެ ކުންފުންޏަށް ވަނީ 898 މިލިއަން ރުފިޔާ ސާފު ފައިދާގެ އެއް ލިބިފަ އެވެ. ނަމަވެސް އޭގެ ކުރީ އަހަރު ލިބުނީ 840 މިލިއަން ރުފިޔާ އެވެ.