ހަތްދިހާއިގެ ފަހުކޮޅު ނިކުތް ފިލްމު "މެން އިން ބްލެކް" ގެ ސްޕިން އޮފް ފިލްމުގެ ކާސްޓަށް ރެބެކާ ފާގްސަން އިތުރުކޮށްފި އެވެ. ރެބެކާ އެންމެފަހުން ފެނިގެންދިޔައީ މިދިޔަ މަހު ނިކުތް ޓޮމް ކްރޫސްގެ ފިލްމު "މިޝަން: އިމްޕޮސިބަލް - ފޯލްއައުޓް" އިންނެވެ. މިޝަން އިމްޕޮސިބަލްގެ 2015 ވަނަ އަހަރު ނިކުތް ފިލްމުގައިވެސް އޭނާ ފެނިގެންދިޔަ އެވެ.
"ދަ ފޭޓް އޮފް ދި ފިއުރިއަސް" ގެ ޑައިރެކްޓަރު އެފް ގެރީ ގްރޭ ޑައިރެކްޓުކުރާ މި ފިލްމުގެ ކާސްޓުގައި މިހާރު ހިމެނޭ ތަރިންނަކީ ކްރިސް ހެމްސްވޯތު، ޓެސާ ތޮމްޕްސަން، ލިއަމް ނީސަން، ލެޒް ޓުވިންސް، ކުމައިލް ނަންޖިއާނީ، ރެފް ސްޕަލް އަދި އެމާ ތޮމްޕްސަން އެވެ.
ސޮނީ ފިކްޗާސްގެ ކުޑައިގެ ދަށުން ގެނެސްދޭ މި ފިލްމު ޕްރޮޑިއުސްކުރަނީ ވޯލްޓާ އެފް ޕާކްސް އާއި ލޯރީ މެކްޑޮނާލްޑް އެވެ. އެގްޒެކެޓިވް ޕްރޮޑިއުސަރަކީ ސްޓީވެން ސްޕީލްބާގް އެވެ. ސޮނީގެ ފަރާތުން މި ފިލްމުގެ މަސައްކަތް ބަލަހައްޓާނީ ޑޭވީޑް ބިއުބޭރް އެވެ.
މީގެ އޮރިޖިނަލް ފިލްމުގައި ލީޑުން ފެނިގެންދިޔަ ދެ ތަރިން ކަމުގައިވާ، ވިލް ސްމިތް އާއި ޓޮމީ ލީ ޖޯންސް މި ފިލްމަކު ނުފެންނާނެ އެވެ. ލީޑު ކާސްޓަށް މިފަހަރު ނަގާފައި ވަނީ މުޅިން އާ ދެ ތަރިންނެވެ. އެ ފިލްމުގައި ޖޯންސް އާއި ސްމިތް ކުޅުނީ ސިއްރު ޖަމިއްޔާއެއްގެ ދެ އޭޖެންޓުންގެ ރޯލެވެ.
ބޮޑު ތަރުހީބެއް ލިބުނު އެ ފިލްމުގެ ސީކުއެލް ދެ ފިލްމެއްވެސް ގެނެސްދީފައިވެ އެވެ. އެ ތިން ފިލްމު އެއްކޮށް، 1.7 ބިލިއަން ޑޮލަރުގެ ބޮޑު އާމްދަނީއެއް ހޯދާފައިވެ އެވެ.