ރާއްޖޭގެ އެންމެ ބޮޑު ޕްރޮޑަކްޝަން ހައުސް ޑާކް ރެއިން އެންޓަޓެއިންމަންޓުގެ މިދިޔަ ހޯމަ ދުވަހު ވަނީ އެމީހުންގެ އާ ފިލްމު "ގޮށްރާޅު" ފުރަތަމަ ޓްރެއިލާ އާންމުކޮށްފަ އެވެ. މި ޓްރެއިލާއަށް ބެލުންތެރިންގެ ގިނަ ތައުރީފުތައް އަންނަނީ ލިބެމުންނެވެ. އަނެއްކާވެސް ދިވެހި ރިހި ސްކްރީނުގައި އެހާ އާންމު ނޫން ޖޯންރާއަކުން އަންނަ މި ފިލްމަށް ކުރެވޭ އުންމީދު ފޮންޏެވެ.
"އަހްމަދު ޝިނާން އަދި ފިލްމުގެ ޓީމުން ދިވެހި ސިނަމާއަށް އާ ބެންޗްމާކެއް ގެނެސްދީފި،" މިއީ ޑާކް ރެއިންގެ ކާމިޔާބު ގިނަ ފިލްމުތަކެއް ޑައިރެކްޓުކޮށްފައިވާ ޑައިރެކްޓަރު އަލީ ޝިފާއު (ޗިއްޕެ)، "ގޮށްރާޅު" ގެ ޓްރެއިލާ އާންމުކުރި ދުވަހު ފޭސްބުކްގައި ކޮށްފައިވާ ފޯސްޓެއްގައި ބުނެފައިވާ ބަސްކޮޅެކެވެ.
ކްރައިމް ތްރިލާ މި ފިލްމުގެ ފުރަތަމަ ޓީޒާ ދައްކާލި ދުވަހުވެސް ޗިއްޕެ ވަނީ މިއީ ހައިރާންކޮށްލާނެވަރުގެ ފިލްމަކަށް ވާނެ ކަމަށް ބުނެފަ އެވެ.
ބެންޗްމާކްއަކަށް މި ފިލްމު ވުމުގެ ފުރުސަތުވެސް ބޮޑެވެ. ސަބަބަކީ މި ފިލްމުގެ ޑައިރެކްޓަރު، ޝިނާންއަކީ މީގެ ކުރިންވެސް ދިވެހި ސިނަމާއަށް ތަފާތު ސްޓައިލެއްގެ ފިލްމެއް ގެނެސްދީ ބެލުންތެރިން ހައިރާންކޮށްލާފައިވާ ޑައިރެކްޓަރަކަށް ވުމުންނެވެ. އެއީ 2016 ވަނަ އަހަރު ރިލީޒްކުރި ބިރުވެރި ފިލްމު "4426" އެވެ. އެ ފިލްމު މަޝްހޫރުވީވެސް "މާސްޓާޕީސް" ފިލްމެއްގެ ގޮތުގަ އެވެ.
މިއަށް ބާރުދޭ އަނެއް ސަބަބަކީ މި ފިލްމުގެ ވާހަކައާއި ސްކްރީންޕްލޭ ތައްޔާރުކުރީ، ދިވެހި ސިނަމާގައި ބޮޑު ކާމިޔާބީތަކެއް ހޯދި ފިލްމުތައް ކަމުގައިވާ "ލޫދިފާ" އާއި "ހެޕީ ބާތްޑޭ" ގެ ސްކްރީންޕްލޭ ތައްޔާރުކުރި މޫމިން ފުއާދު އެވެ. މި ދެ ފިލްމުގެ ތެރެއިން "ހެޕީ ބާތްޑޭ" އަކީ ޑާކް ރެއިން ގެނެސްދިން ސަސްޕެންސް ތްރިލާ އެކެވެ. ކާމިޔާބު އެ ފިލްމު ވެގެންދިޔައީ ދިވެހި ސިނަމާގެ ފިލްމީ ތާރީހުވެސް ބަދަލުކޮށްލި ފިލްމަކަށެވެ.
ކުޅަދާނަ ޑައިރެކްޓަރަކާއި ކުޅަދާނަ ސްކްރީން ރައިޓަރެއްގެ ކޮމްބިނޭޝަންގައި ހުރި ކުޅަދާނަ ކަމެއް އަންނަ ނޮވެމްބަރު މަހުގެ ފަހެއްގައި އިނގިގެން ދާނެ އެވެ. ބެންޗްމާކްއަކަށް ވުމުގެ އުންމީދު އޮތް މި ފިލްމު ސިނަމާތަކުގައި ދައްކަން ފަށަނީ އެ ތާރީހުގަ އެވެ.
ލީޑު ރޯލުން ޖުމައްޔިލް ނިމާލް ފެނިގެންދާ މި ފިލްމުގައި މުހިންމު ރޯލުތަކުން ހަސަން އިރުފާން (ޒަކިއްޓެ) އަދި އިސްމާއިލް ރަޝީދު (ކޮޕީ އިއްސެ) ފެނިގެންދާނެ އެވެ. މިއީ ޒަކިއްޓެއް ދިވެހި ސިނަމާއަށް ތައާރަފުވާ ފިލްމެވެ. ކާސްޓުގައި ހިމެނޭ އިތުރު ފަންނާނުންނަކީ ނުޒުހަތު ޝުއައިބް، ތަސްނީމާ، ރަޝްފާ، އަޒާން، ނާސިތް އަދި ހަމްދާން އެވެ. މީގެ ތެރޭގައިވެސް ގިނައީ ދައިރާއަށް އަލަށް ތައާރަފުވާ ފަންނާނުންވެ.