އަލަަށް އަމަލު ކުރަން ފެށި ޝަރީއަތް ކުރުމާބެހޭ ގާނޫނަށް ތައްޔާރު ވުމުގެ ގޮތުން މިއަދު ކުރިމިނަލް ކޯޓްގައި ތައާވަލް ކުރި ހުރިހާ އަޑުއެހުމެއް ކެންސަލް ކޮށްފި އެވެ.
ޖިނާއީ އިޖުރާއާތުގެ ގާނޫނުގެ ދަށުން، ޝަރީއަތްކުރުމާ ގުޅޭގޮތުން ހަދަންޖެހޭ ގަވާއިދު ސުޕްރީމް ކޯޓުން ހަދައި އާންމުކޮށްފައިވަނީ އިއްޔެ އެވެ.
ކުރިމިނަލް ކޯޓްގައި މިއަދު ތައާވަލްކުރި ހުރިހާ ޝަރީއަތެއް ކެންސަލް ކޮށްފައިވަނީ އިއްޔެ އަމަލު ކުރަން ފެށި ޝަރީއަތް ކުރުމާބެހޭ ގާނޫނަށް ތައްޔާރު ވުމުގެ ގޮތުން ކަމަށް އެކޯޓުން ބުންޏެވެ.
މިދިޔަ އަހަރުގެ ޖުލައި މަހު އަމަލުކުރަން ފެށި ޖިނާއީ އިޖުރާއަތުގެ ގާނޫނުގެ ބަޔާންކޮށްފައިވާ ގޮތުގައި، ޖިނާއީ އިޖުރާއާތުގެ ގާނޫނުގެ ދަށުން ޝަރީއަތްކުރުމާ ގުޅޭގޮތުން ހަދަންޖެހޭ ގަވާއިދުތައް ހަދާނީ ސުޕްރީމް ކޯޓުންނެވެ. ގާނޫނުގައިވާ ގޮތުން ގަވާއިދުތައް، ގާނޫނަށް އަމަލުކުރަން ފަށާ ތާރީހުން ފެށިގެން ތިން މަސް ދުވަހުގެ ތެރޭގައި ހަދައި ނިންމަން ޖެހޭނެ އެވެ. ނަމަވެސް ގާނޫނުގައިވާ މުއްދަތު ހަމަވެ އެތައް މަހެއްވީއިރު ވެސް ސުޕްރީމް ކޯޓުން ގަވާއިދުތައް އެކުލަވާލާފައެއް ނުވެ އެވެ.
ޖުމްލަ 17 ބާބެއްގެ މައްޗަށް އެކުލެވިގެންވާ ގަވާއިދުގައި، ޖިނާއީ މައްސަލަތައް ކޯޓުތަކަށް ހުށަހެޅުމާއި، ހުށަހަޅާ މައްސަލަތައް ކޯޓުތަކުން ބަލައިގަތުމާއި، ޝަރީއަތް ހިންގުމުގައި ކޯޓުތަކުން އަމަލުކުރަންޖެހޭ އެއްގޮތް އުސޫލުތައް ހިމެނެއެވެ. އަދި ކުށުގެ ތުހުމަތުގައި ބަންދުކުރެވޭ މީހުންގެ ބަންދާމެދު ގޮތެއް ނިންމުމުގައްޔާއި، ކަފާލާތުގެ ދަށުން ދޫކުރުމާއި، ކޯޓު އަމުރު ނެރުމުގައި ކޯޓުތަކުން އަމަލުކުރާނެ އެއްގޮތް އުސޫލުތަކާއި، ހޭބިއަސް ކޯޕަސް އަމުރު ނެރެމާގުޅޭ އުސޫލުތައް ހިމެނެއެވެ. އޭގެ އިތުރުން، ޖިނާއީ މައްސަލަތަކުގެ ޝަރީއަތްތަކާ ގުޅިގެން ކޯޓަށް މީހުން ހާޒިރުކުރުމުގައި އަމަލުކުރަންޖެހޭ އުސޫލުތައް ފަދަ އުސޫލުތައް ވެސް މި ގަވާއިދުގައި ހިމެނެއެވެ.