ހަޑާސް ފީލްޑް ޓައުންގެ މައްޗަށް 3-0 ގެ ނަތީޖާއަކުން ކާމިޔާބު ހޯދައި ޗެލްސީގެ ކޯޗް މައުރީޒިއޯ ސާރީ މޮޅަކުން އޭނާގެ ޕްރިމިއާ ލީގް އެކައުންޓް ހުޅުވައިފި އެވެ.
ހަޑާސް ފީލްޑު ދަނޑު، ޖޯން ސްމިތު ސްޓޭޑިއަމްގައި، އެ ޓީމުން ން ކުރިމަތި ކުރި ޕްރެޝާތަކަށް ޗެލްސީން ނިމުން ގެނައީ މެޗުގެ 34 ވަނަ މިނެޓްގައި، ކާމިޔާބު ކުރި ފުރަތަމަ ލަނޑުންނެވެ. ޕެނަލްޓީ އޭރިއާ އަރިމަތިން ވިލިއަން ހުރަސްކޮށްދިން ބޯޅަ ގޯލްތެރެއަށް ފޮނުވާލީ އެންގޯލާން ކަންޓޭ އެވެ.
ޗެލްސީގެ ދެ ވަނަ ލަނޑަކީ، ހަޑާސްފީލްޑްގެ ޕެނަލްޓީ އޭރިއާ ތެރެއިން، މާކޯސް އޮލޮންސޯ ބޯޅަ ފޮނުވާލަށް އުޅުމުން، ހަޑާސްފީލްޑްގެ ޑިފެންޑަރު ކްރިސްޓޮފާ ޝިންޑްލާ. އޭނާ އަށް ހުރަސް އެޅުމުން ދިން ޕެނަލްޓީއެއްގައި ކާމިޔާބު ކުރި ލަނޑެކެވެ. ހާޑާސްފީލްޑްޓައުންގެ ކީޕަރު ބެން ހޭމާއަށް ޕެނަލްޓީގެ މިސްރާބު އޮޅުވާލައި ލަނޑު ކާމިޔާބު ކުރީ، ސާރީ އާއެކު ނަޕޯލީ ދޫކޮށް ޗެލްސީއަށް ބަދަލުވި ޖޯޖީނިއޯ އެވެ. އެ ލަނޑު ޖެހީ މެޗުގެ 45 ވަނަ މިނެޓްގަ އެވެ.
ދެ ވަނަ ހާފުގައި، ވިލިއަންގެ ބަދަލުގައި ޗެލްސީގެ ތަރި އެޑެން ހަޒާޑް ކުޅެން ނިކުތެވެ. އޭނާ ކުޅެން ނިކުތްތާ ހަތަރު މިނެޓް ފަހުން އޭނާ ވަނީ ޗެލްސީގެ ތިން ވަނަ ލަނޑު ޖަހަން ފުރުސަތު ތަނަވަސް ކޮށްދިފަ އެވެ. ކައުންޓަ އެޓޭކް ފުރުސަތެއްގައި ލިބުނު ބޯޅަ ހިފައިގެން ޕެނަލްޓީ އޭރިއާ ހަމައަށް ގޮސް ހަޒާޑް ބޯޅަ ތަނަވަސް ކޮށްދީނީ ހުހަށް ހުރި ޕެޑްރޯ އަށެވެ. އޭނާ ވަނީ ބެން ހޭމާއަށް ވެސް ފުރުސަތު ނުދީ ގޯލް ތެރެއަށް ބޯޅަ ވައްދާލަފަ އެވެ.
މެޗު އެންމެ ހާއްސަވި ކުޅުންތެރިޔަކަށް ވާނީ، ޗެލްސީގެ އާ ކީޕަރު ކެޕާ އަރައިޒަބަލާގާ އެވެ. އޭނާގެ ގޯލަށް ނުރައްކާކޮށް އައީ އެންމެ ބޯޅައެކެވެ. ހަޑާސްފީލްޑުން ހިލޭ ޖެހުމުން ނެގި ހުރަހެއްގައި، ފިލިޕް ބިލިންގް ބޮޅުން ފޮނުވާލީ ބޯޅަ ގޯލްގެ މަތީ ކަނާ އަމާޒުވާން ދަނިކޮށް ކެޕާ ވަނީ އެ ބޯޅަ ކޯނަރަކަށް ބޭރު ކޮށްލާފަ އެވެ.
މެޗަށް ފަހު ވާހަކަ ދައްކަމުން ކޮންޓޭ ބުނީ، މުބާރާތުގެ ފުރަތަމަ މެަޗަކީ ފަސޭހަ މެޗެއް ނޫން ކަމަށާއި ފިޒިކަލީ ވަރުގަދަ ޓީމަކާ ދެކޮޅަށް ކުޅެގެން މޮޅުވުމުން ހިތްހަމަ ޖެހޭ ކަމަށެވެ.
ނިއުކާސަލް އާއި ޓޮޓެންހަމް މެޗުގެ ކުރިން، ނިއުކާސަލްގެ ސަޕޯޓަރުން ވަނީ، އެ ޓީމުގެ އޯނަރު މައިކް އެޝްލީއާ ދެކޮޅަށް އަޑު އުފުލާފަ އެވެ. ސުލުހަވެރިކޮށް ދިޔަ ހަރަކާތުގައި ސަޕޯޓަރުން ގޮވާލަމުން ދިޔާއީ އޭނާ ޓީމު ދޫކޮށް ދިއުމަށެވެ. މަޝްހޫރު ބިލިއަނަރުގެ އޯނާޝިޕްގެ ދަށުގައި އޮތް ނަމަވެސް ޓްރާންސްފާ ޕީރިއަޑްގައި އެދޭވާ މަސައްކަތެއް ނުކުރާތީ ސަޕޯޓަރުންގެ ފަރާތުން އޭނާއަށް ކުރިމަތިވާ ފާޑު ކިޔުންތައް ވަނީ އިތުރުވެފަ އެވެ.
ސްޕާސްއަށް މިފަހަރުގެ ޓްރާންސްފާއިގައި އެއްވެސް ކުޅުންތެރިޔަކު ގެނެސްފައެއް ނުވެ އެވެ. މެޗުގައި ފުރަތަމަ ލީޑް ނެގީ، ސްޕާސްއިންނެވެ. އެ ޓީމުގެ ލަނޑު މެޗުގެ އަށް ވަނަ މިނެޓްގައި ކާމިޔާބު ކުރީ ޖޯން ވަޓޮންގޮން އެވެ. އޭގެ ތިން މިނެޓް ފަހުން ހޮސެލޫ ވަނީ ނިއުކާސަލްއަށް ނަތީޖާ ހަމަހަމަ ކޮށްދީފަ އެވެ. ނަމަވެސް މެޗުގެ 18 ވަނަ މިނެޓްގައި ޑެލީ އަލީ ވަނީ ޓޮޓެންހަމްއަށް ލީޑް ނަގައިދިފަ އެވެ. މެޗު ނިމިގެން ދިޔައީ 2-1 ޓޮޓެންހަމް މޮޅުވެގެންނެވެ.
މެޗަށް ފަހު ޓޮޓެންހަމްގެ ކޯޗް ޕޮޗެޓިނޯ ވަނީ ޓީމުގެ ވޯލްޑްކަޕު ތަރިންނަށް ތައުރީފު ކޮށްފަ އެވެ. ނިއު ކާސަލްގެ ކޯޗު ބެނިޓޭޒް ބުނީ މެޗު އެއްވަރު ކޮށްލައިގެން ނިއުކާސަލްއަށް ނިންމާލެވުނިސް ކަމަށެވެ.