ގަތަރުގައި ގައުމީ ފުޓްބޯޅަ ޓީމުން މިހާރު ކުރިއަށް ގެންދާ، ޓްރެއިނިން ކޭމްޕްގައި އެ ގައުމުގެ ދެ ވަނަ ޑިވިޝަންގެ އަލް މަރްހިއްޔާއާ ދެކޮޅަށް ކުޅުނު މެޗަކީ ވަރަށް އުނދަގޫ މެޗެއް ކަމަށް ގައުމީޓީމުގެ ކޯޗް ޕީޓާ ޝެގަޓް ބުނެފި އެވެ.
ގަތަރުގެ ދެ ވަނަ ޑިވިޝަންގެ އެންމެ ކާމިޔާބު އެއް ކުލަބު، އަލުން ދެ ވަނަ ޑިވިޝަނަށް ވެއްޓުނީ މިދިޔަ ސީޒަންގަ އެވެ. އެ ޓީމާ ދެކޮޅަށް ކުޅުނު މެޗު ރާއްޖެއިން ކާމިޔާބު ކުރީ 4-3 ންނެވެ.
މެޗުގައި ޝެގަޓް ވަނީ ކުޅުންތެރިން އާންމުކޮށް ކުޅޭ ޕޮޒީޝަން ބަދަލުކޮށް ކުޅުވާފަ އެވެ. އެގޮތުން އާންމުކޮށް މެދުތެރެއަށް ކުޅޭ، ވިކްޓަރީ ސްޕޯޓްސް ކުލަބުގެ ހުސައިން ނިހާން (ނިހާޓް) މެޗު ފެށީ ރައިޓް ޑިފެންޑަރުގެ މަގާމުންނެވެ. ފޯވަޑަކަށް ނުވަތަ އެޓޭކިން މިޑްފީލްޑަރަކަށް ކުޅޭ މުހައްމަދު އުމޭރުއަށް ފުރުސަތު ދިނީ ސެންޓްރަލް މިޑްފީލްޑަރެއްގެ ރޯލުންނެވެ. ޑިފެންސުން ފަޅިއަށް ކުޅޭ ގްރީން ސްޓްރީޓްގެ ސަމްދޫހް މުހައްމަދު ކުޅުވާފައި ވަނީ ސެންޓްރަލް ޑިފެންސަށެވެ.
ބޫޓާން މެޗުގައިވެސް ސެންޓްރަލް ފޯވަޑަށް ކުޅުނު ނާއިޒް ހަސަން (ދާދު) މި މެޗުގައިވެސް ކުޅުނީ ސެންޓަރަލް ފޯވަޑަށެވެ. އޭނާ ވަނީ މެޗުގައި ދެ ލަނޑު ޖާހަފަ އެވެ. އަނެއް ދެ ލަނޑު ކާމިޔާބު ކުރީ މުހައްމަދު އާރިފް (ބަކާ) އާއި ހަމްޒާ މުހައްމަދު (ހަމްޕް) އެވެ.
މެޗުގައި، ކެޕްޓަން އަކުރަމް އަބްދުލް ގަނީ އާއި މުޖުތާޒް (މުޖޭ) އަދި އަހްމަދު އިމާޒް (އާއްކޮ) ކުޅެފައެއް ނުވެ އެވެ. އެ ކުޅުންތެރިން އަންނަނީ އަނިޔާއިން ރިކަވާ ވަމުންނެވެ. އަކުރަމްގެ ބަދަލުގައި ކެޕްޓަންގެ ރޯލު މެޗުގައި އަދާ ކުރީ ބަކާ އެވެ.
އަލީ ފާސިރު (ސެންޓޭ) ވެސް ކުޅޭފައި ވަނީ މަދު ވަގުތު ކޮޅެއްގަ އެވެ. މުހައްމަދު އިރުފާން (އިރޭ) ހުސައިން ޝިފާއު ޔޫސުފް (ކްރޯ) ކުޅެން އެރީ މެޗުގެ އެންމެ ފަހު 25 މިނެޓްގަ އެވެ. ފޯވަޑް އަސަދުﷲ އަބްދުﷲ ވެސް ކުޅެން އެރީ އެންމެ ފަހު 20 މިނެޓްގަ އެވެ.
"ވަރަށް ބުރަކޮށް އަށް ދުވަސް ވަންދެން ކޮންމެ ދުވަހަކު ދެ ފަހަރު މަސައްކަތް ކުރުމަށް ފަހު މި މެޗަށް ކުޅުންތެރިން ނިކުތީ، ޒުވާން ކުޅުންތެރިންނާއެކު ވަރަށް އުނދަގޫ މެޗެއް." ޝެގަޓް ފޭސްބުކްގައި ބުނެފައި ވެއެވެ.
އެފްއޭއެމުން ދަނީ، ގަތަރުގެ ޓްރެއިނިން ކޭމްޕްގައި ޕާކިސްތާނާ ދެކޮޅަށް އެކުވެރި ކަމުގެ މެޗެއް ކުޅުމަށް މަސައްކަތް ކުރަމުންނެވެ. ޕާކިސްތާން ޓީމު ޓްރެއިނިން ކޭޕްގައި ތިބީ ގަތަރުގެ އަވަށްޓެރި ބްހްރެއިންގަ އެވެ.