ޔޫރަޕްގެ ބައެއް ގައުމުތަކަށް މި ދުވަސްވަރަކީ ހޫނުގަދަ ދުވަސްވަރެކެވެ. ފިންލޭންޑްފަދަ ގައުމުތަކުގައި ހޫނު ގަދަވުމުގެ ސަބަބުން ރޭނގަޑު ނިދަންވެސް މީހުނަށް އުނދަގޫވެ އެވެ. ވަރަށް މަދު ގެއެއްގައި ނޫނީ ފިންލޭންޑުގައި އޭސީވެސް ހަރުކޮށްފައެއް ނުހުރެ އެވެ.
މި އުނދަގުލުން މީހުނަށް ލުޔެއް ހޯދައިދިނުމަށް ފިންލޭންޑުގެ ވެރިރަށް ހެލްސިންކީގައި ސުޕަމާކެޓެއް ހިންގަމުން އަންނަ މީހަކު އޭނާގެ ސުޕަމާކެޓުގައި، ފިނީގައި ކަސްޓަމަރުންނަށް ނިދުމުގެ ފުރުސަތު ވަނީ ދީފަ އެވެ. އޭނާ މިކަން ކުރަން ނިންމީ ސުޕަމާކެޓަށް ވިޔަފާރީ ކުރަން އައި ކަސްޓަމަރުންތަކެއް ހޫނުގަދަވެގެން ނުނިދޭ ވާހަކަ ދައްކާ އަޑުއިވިގެންނެވެ.
ކަސްޓަމަރުންނަށް ސުޕަމާކެޓުގައި ނިދުމުގެ ފުރުސަތުދިނީ އެ ގައުމުގެ ފުޑް ސޭފްޓީ ރެގިއުލޭޓަރާއި ވާހަކަދެއްކުމަށްފަހު ސާފުތާހިރުކަން ދަމަހައްޓާނެކަމުގެ މަތިން އެ އިދާރާއިން ހުއްދަދިނުމުންނެވެ.
އެ ސުޕަމާކެޓުގައި ނިދުމުގެ ފުރުސަތު 100 ކަސްޓަމަރުންނަށް ދިނެވެ. ކޮންމެ ކަސްޓަމަރަކުވެސް ސްލީޕިން ބޭގްއަކާއި ކުނަލެއް ގެނަންޖެހުނެވެ. ކަސްޓަމަރުން އެ ސުޕަމާކެޓުގައި ނިދާ ވީޑިއޯވެސް މިހާރު އަންނަނީ ޝޯޝަލް މީޑިއާގައި ދައުރުވަމުންނެވެ. މިހާތަށް 761 ހާހަށްވުރެ ގިނަ މީހުން އެ ވީޑިއޯ ބަލާފައިވެ އެވެ.