ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހިމްގެ މަންމާފުޅުގެ ހަނދާނުގައި ހުޅުމާލޭގައި މިސްކިތެއް ހުޅުވައިފި އެވެ.
އުމުރުފުޅުން 80 އަހަރުގައި މެޑަމް ފާތުންގެ މަންމާފުޅު އައިޝަތު މޫސާ އަވަހާރަވީ 2016 ވަނަ އަހަރުގެ ނޮވެމްބަރު މަހުގެ ތެރޭގަ އެވެ.
ހުޅުމާލެ ރެހެންދި ސްކޫލް ކައިރީގައި އައިޝަތު މޫސާގެ ހަނދާނުގައި ހަދާފައިވާ މިސްކިތް މިއަދު އަސްރު ނަމާދުގެ ވަގުތުގައި ހުޅުވައިދެއްވީ ރައީސް އަބްދުﷲ ޔާމީނެވެ. މިސްކިތުގެ ނަމަކީ "މަސްޖިދުލް ވާލިދައިން" އެވެ.
މިސްކިތް ހުޅުވުމަށްފަހު ރައީސް ވަނީ އެ މިސްކިތުގައި އަސްރު ނަމާދު ކުރައްވާފަ އެވެ. ނަމާދުގައި މެޑަމް ފާތުން ވެސް ބައިވެރިވެވަޑައިގަތެވެ.
ސަރުކާރުގެ އިސް ބޭފުޅުން ވެސް ބައިވެރިވެވަޑައިގެންނެވިއިރު ނަމާދަށްފަހު މިސްކިތުގައި ތިބި މީހުންނާ ރައީސް އަދި މެޑަމް ވަނީ ސަލާމް ކުރައްވާފަ އެވެ. މިސްކިތު ސަރަހައްދުގައިި ހައްޖު ދުވަހު ރޯދަ ހިފި މީހުންނަށް ހާއްސަ ރޯދަ ވީއްލުމެއް ވެސް ބޭއްވި އެވެ.
