ރައީސް އަބްދުﷲ ޔާމީން ހދ. ކުޅުދުއްފުއްޓަށް ވަޑައިގެންނެވުމުން މިރެއަށް ފަސްކޮށްފި އެވެ. ކުރިން އޮތް ގޮތުން ރައީސް ކުޅުދުއްފުއްޓަށް ވަޑައިގެންނެވުމަށް ހަމަޖެހިފައި އޮތީ ހަވީރު އެވެ.
އަޑުގަދަކުރާއިން ރަށުގައި މިއަދު ހެނދުނު ވަނީ ރައީސް ހަވީރު ވަޑައިގަންނަވާކަން އިއުލާންކޮށްފަ އެވެ. ނަމަވެސް ރައީސް މިހާރު ކުޅުދުއްފުއްޓަށް ވަޑައިގަތުމަށް ހަމަޖެހިފައިވަނީ މިރޭ 8:15 ގައި ކަމަށް މިހާރު އަޑުގަދަކުރާއިން ދަނީ ގޮވަމުންނެވެ.
ރައީސްގެ ދަތުރުފުޅަށް ފަހު ވަގުތު ބަދަލު ގެނައި ސަބަބެއް ސާފެއް ނުވެ އެވެ. ނަމަވެސް މިއަދު ހަވީރު ކުޅުދުއްފުށީގައި މަށިމާލި ޕެރޭޑް ބޭއްވުމަށް ވަނީ ހަމަޖެހިފަ އެވެ. އެ ކުޅިވަރަކީ ރަށުގެ ގިނަ ބަޔަކު ބައިވެރިވާ އަދި އެތައް ބަޔަކު ބެލުމަށްދާ ކުޅިވަރެކެވެ.
ރައީސް ކުޅުދުއްފުއްޓަށް ވަޑައިގަންނަވަނީ މަގު ހެދުމުގެ މަޝްރޫއު އާއި ގޮނޑުދޮށް ހިމާޔަތްކުރުމުގެ މަޝްރޫއުގެ ނިމުން ފާހަގަކުރުމަށެވެ. ކުރިން ވެސް ހަމަޖެހިފައިވާ އޮތް ގޮތަށް ރައީސް މިހާރު ވަނީ ނޮޅިވަރަމްފަރަށް ވަޑައިގެންފަ އެވެ. އެ ރަށަށް ވަޑައިގެންނެވީ ބަނދަރު ހުޅުވައިދެއްވުމަށެވެ.